മലയാളത്തിൽ ഒരുപിടി അമ്മ വേഷങ്ങളാണ് കെപിഎസി ലളിത പകർന്നാടിയത്. മകൻ ഐസിയുവിൽ കിടക്കുമ്പോഴാണ് സു സു സുധീ വാത്മീകം ചെയ്യാൻ ലളിത ചേച്ചി എത്തിയതെന്ന് സംവിധായകൻ രഞ്ജിത്ത് ശങ്കർ ഓർക്കുന്നു.

അഭിനയം അവർക്ക് ജീവനും ജീവിതമായിരുന്നുവെന്നും മറ്റേത് സിനിമയാണെങ്കിലും അവരത് ചെയ്യുമെന്നും അദ്ദേഹം തന്റെ ഓർമ്മക്കുറിപ്പിൽ പറയുന്നു. സുധീ വാത്മീകത്തിലെ ചില നിമിഷങ്ങൾ ഓർത്തെടുത്താണ് കെപിഎസി ലളിതയെ അദ്ദേഹം അനുസ്‌മരിച്ചത്.

'സു സു സുധി വാത്മീകത്തിൽ സുധിയുടെ കല്യാണ നിശ്ചയം ഷൂട്ട് ചെയ്തത് ലളിത ചേച്ചിയുടെ കാർമികത്വത്തിലാണ്. ആ സീനിൽ സുധി ഏതു വിരലിലാണു മോതിരം ഇടേണ്ടത് എന്ന് സംശയം ചോദിക്കുന്നതും അമ്മ അത് പറഞ്ഞു കൊടുക്കുന്നതും സ്വന്തം മകന്റെ നിശ്ചയ സമയത്ത് നടന്നത് ചേച്ചി പറഞ്ഞു എഴുതിയതാണ്.

അന്ന് ഗുരുതരമായ ഒരപകടം പറ്റി സിദ്ധു ഐസിയുവിലാണ്. ആ സിനിമ പൂർത്തിയാക്കാൻ ആശുപത്രിയിൽ നിന്നാണ് ചേച്ചി വന്നത്. മറ്റേത് സിനിമ ആണെങ്കിലും ചേച്ചി അത് തന്നെ ചെയ്യുമായിരുന്നു. കാരണം ചേച്ചിക്ക് അഭിനയം ജീവനും ജീവിതമായിരുന്നു. ഇനി നമുക്ക് അങ്ങിനെ ഒരു നടിയില്ല."