അമ്പലപ്പുഴ: ആശുപത്രിയിലെ സ്റ്റാഫ് നഴ്സിനെ കടന്നുപിടിച്ച ആരോഗ്യ വകുപ്പ് ഡ്രൈവറെ പൊലീസ് അറസ്റ്റ് ചെയ്തു. അമ്പലപ്പുഴ അർബൻ ഹെൽത്ത് ട്രെയിനിംഗ് സെന്ററിലെ ഡ്രൈവർ ചേർത്തല വെട്ടക്കൽ മംഗലശേരി രമേശനെയാണ് (55) അമ്പലപ്പുഴ പൊലീസ് അറസ്റ്റ് ചെയ്തത്. അർബൻ ഹെൽത്ത് ട്രെയിനിംഗ് സെന്ററിലെ സ്റ്റാഫ് നഴ്സ് നൽകിയ പരാതിയിലാണ് നടപടി . പരാതിയെത്തുടർന്ന് രമേശനെ മെഡിക്കൽ കോളേജ് പ്രിൻസിപ്പൽ ജോലിയിൽ നിന്ന് സസ്പെൻഡ് ചെയ്തിരുന്നു. കഴിഞ്ഞ ദിവസം വൈകിട്ട് ഡ്യൂട്ടി ചെയ്യുന്ന സമയത്ത് മാസ്ക് വാങ്ങാനായെത്തിയ രമേശൻ തന്നെ കയറിപ്പിടിച്ചെന്നാണ് നഴ്സ് അഡ്മിനിസ്ട്രേറ്റീവ് ഓഫീസർക്ക് നൽകിയ പരാതിയിലുണ്ടായിരുന്നത്. സി.സി ടിവി ദൃശ്യങ്ങൾ പരിശോധിക്കണമെന്നും അവർ പരാതിയിൽ ആവശ്യപ്പെട്ടു. പരാതി പിന്നീട് പൊലീസിന് കൈമാറുകയായിരുന്നു. സമാനമായ പരാതികൾ നേരത്തെയും രമേശനെതിരെ ഉയർന്നിട്ടുണ്ടാണെന്നാണ് ഇപ്പോൾ പുറത്തുവരുന്ന വിവരം.