കാബുൾ: യുദ്ധം അവസാനിപ്പിക്കാൻ റഷ്യയേയും യുക്രെയിനെയും ഉപദേശിച്ച് താലിബാൻ. ഇരു രാജ്യങ്ങളും സംയമനം പാലിക്കണമെന്നും അക്രമത്തിന്റെ വ്യാപ്തി കൂട്ടുന്ന നടപടിയിൽ നിന്ന് റഷ്യയും യുക്രൈനും പിൻവാങ്ങണമെന്നും താലിബാൻ ആവശ്യപ്പെട്ടു.

സമാധാനപരമായി പ്രശ്‌നം പരിഹരിക്കാം.സംഘർഷം മുന്നോട്ട് കൊണ്ടു പോയാൽ കൂടുതൽ പൗരന്മാർക്ക് അപകടം പറ്റിയേക്കാമെന്നും അഫ്‌ഗാനിലെ താലിബാൻ ഭരണകൂടം വ്യക്തമാക്കി. വിഷയത്തിൽ ചർച്ചകൾ വേണമെന്ന് പറഞ്ഞ താലിബാൻ പക്ഷം ചേരില്ലെന്ന് വ്യക്തമാക്കിയിട്ടുണ്ട്. യുക്രെയിനിലെ അഫ്ഗാൻ വിദ്യാർത്ഥികളുടെയും കുടിയേറ്റ ജനതയുടെയും സുരക്ഷ ഉറപ്പാക്കണമെന്നും താലിബാൻ ആവശ്യപ്പെട്ടു.

എന്നാൽ താലിബാന്റെ പ്രസ്താവനയ‌ക്ക് സോഷ്യൽ മീഡിയയിൽ മുഴുവൻ പരിഹാസമാണ് ലഭിക്കുന്നത്. ഈ നൂറ്റാണ്ടിലെ ഏറ്റവും വലിയ തമാശ എന്നാണ് ചിലർ കുറിച്ചത്.