ന്യൂയോർക്ക് : അറ്റ്ലാൻഡിക് സമുദ്രത്തിന് മുകളിലൂടെ ഒറ്റയ്‌ക്ക് പറന്ന ആദ്യ വനിതാ പൈലറ്റായ അമേലിയ എയർഹാർട്ട് ധരിച്ചിരുന്ന ലെതർ തൊപ്പി ലേലത്തിന്. ലേലത്തിൽ തൊപ്പിയ്ക്ക് കുറഞ്ഞത് 80,000 യു.എസ് ഡോളറെങ്കിലും ലഭിക്കുമെന്നാണ് പ്രതീക്ഷ. തന്റെ ചരിത്രപരമായ ആദ്യ അറ്റ്ലാൻഡിക് യാത്രയിൽ അമേലിയ ഉപയോഗിച്ചതാണ് ഈ തൊപ്പിയെന്ന് ലേലം നടത്തുന്ന ഹെറിറ്റേജ് ഓക്‌ഷൻസ് വ്യക്തമാക്കി.

പൈലറ്റ് ലൈസൻസ് സ്വന്തമാക്കുന്ന ലോകത്തെ 16ാമത്തെ സ്ത്രീയായിരുന്ന അമേലിയ 1928ലാണ് അറ്റ്ലാൻഡികിന് മുകളിലൂടെ പറന്നത്. അന്ന് രണ്ട് പൈലറ്റുമാർ അമേലിയയ്ക്ക് ഒപ്പമുണ്ടായിരുന്നു. പിന്നീട് നാല് വർഷങ്ങൾക്ക് ശേഷമാണ് അമേലിയ ഒറ്റയ്ക്ക് അറ്റ്ലാൻഡികിന് മുകളിലൂടെ പറന്ന് റെക്കോഡ് സ്ഥാപിച്ചത്.

1929ൽ ഒരു എയർഷോയ്ക്കിടെ ഒരു സ്ത്രീയ്ക്ക് ഈ തൊപ്പി കളഞ്ഞുകിട്ടുകയായിരുന്നു. അമേലിയ അന്ന് ആ ഷോയിൽ പങ്കെടുത്തിരുന്നു. ' എ. എയർഹാർട്ട് " എന്ന് തൊപ്പിയുടെ ഉൾവശത്ത് എഴുതിയിരുന്നു. ഈ സ്ത്രീയുടെ മരണശേഷം തൊപ്പി അവരുടെ മകന് കൈമാറുകയായിരുന്നു. ഇയാളിൽ നിന്നാണ് ഹെറിറ്റേജ് ഓക്‌ഷൻസ് തൊപ്പി ഏറ്റെടുത്തത്.

 ആരാണ് അമേലിയ

അറ്റ്ലാ‌ൻഡിക് യാത്രയ്ക്ക് ശേഷം ലോകം ചുറ്റുന്ന ആദ്യ വനിത പൈലറ്റ് എന്ന ലക്ഷ്യത്തോട് കൂടി 1937 മാർച്ച് 17ന് കാലിഫോർണിയയിൽ നിന്ന് സഹായി ഫ്രെഡ് നൂനാനൊപ്പം

ഇലക്ട്ര 10 - ഇ വിമാനത്തിൽ യാത്ര തിരിച്ച അമേലിയയെ പിന്നീട് കാണാതാവുകയായിരുന്നു.

പസഫിക് സമുദ്രത്തിന് മുകളിൽ വച്ച് ചില തകരാറുകളുണ്ടായ വിമാനത്തെ ഹവായിലെത്തിച്ച് പ്രശ്നങ്ങൾ പരിഹരിച്ച് അമേലിയ യാത്ര തുടങ്ങി. പടിഞ്ഞാറ് ദിശയിലേക്ക് യാത്ര തുടങ്ങാനായിരുന്നു നിശ്ചയിച്ചിരുന്നതെങ്കിലും കാലാവസ്ഥ മോശമായതിനെ തുടർന്ന് ആഫ്രിക്കയെ ലക്ഷ്യമാക്കി യാത്ര കിഴക്ക് ദിശയിലേക്ക് മാറ്റി.

ജൂൺ 29ന് അമേലിയ ന്യൂഗിനി വരെ എത്തി. 7,000 മൈലുകൾ കൂടി താണ്ടിയാൽ യാത്ര വിജയകരമായി പൂർത്തിയാക്കാമായിരുന്നു. എന്നാൽ, ജൂലായ് 2ന് ഓസ്ട്രേലിയയ്ക്കും ഹവായിയ്ക്കും മദ്ധ്യേയുള്ള ഹൗലാൻഡ് ദ്വീപിനടുത്തെത്തിയപ്പോൾ വിമാനത്തിന് വീണ്ടും പ്രശ്നങ്ങൾ ഉണ്ടായി. വൈകാതെ അമേരിക്കൻ കോസ്റ്റ് ഗാർഡിന് അമേലിയയുടെ സന്ദേശം ലഭിച്ചു.

തങ്ങളുടെ വിമാനമിപ്പോൾ 1,000 അടി മുകളിലാണെന്നും ഒന്നും കാണാനാകുന്നില്ലെന്നും ഇന്ധനം കുറവാണെന്നും റേഡിയോയിലൂടെ ബന്ധപ്പെടാൻ സാധിക്കുന്നില്ലെന്നുമായിരുന്നു സന്ദേശം. ഇതിന് ശേഷം അമേലിയയ്ക്കും വിമാനത്തിനും എന്ത് സംഭവിച്ചെന്ന് ആർക്കുമറിയില്ല. വിമാനത്തിന്റെ ഇന്ധനം തീർന്ന് കടലിൽ പതിച്ചിരിക്കാമെന്നാണ് അനുമാനം. കാണാതാകുമ്പോൾ 39ാം വയസായിരുന്നു അമേലിയയ്‌ക്ക്.