കീവ്:യുദ്ധം തുടരുന്ന യുക്രെയിനിൽ നിന്ന് പോളണ്ടിലേക്ക് പ്രവേശിക്കാൻ ഇന്ത്യൻ വിദ്യാർത്ഥികൾക്ക് വിസ വേണ്ടെന്ന് ഇന്ത്യയിലെ പോളണ്ട് അംബാസഡർ ആദം ബുരകോവ്സ്‌കി ട്വീറ്റ് ചെയ്തു. രക്ഷാപ്രവർത്തനവുമായി ബന്ധപ്പെട്ട ഇന്ത്യൻ സർക്കാരിന്റെ ശ്രമങ്ങളുടെ ഫലമായാണ് പോളണ്ടിന്റെ അനുകൂല തീരുമാനം. അതിർത്തിയിൽ കുടുങ്ങിയ ഇന്ത്യൻ വിദ്യാർത്ഥികൾക്ക് പോളണ്ടിലേക്ക് കടക്കാൻ കഴിയാത്തത് പ്രതിസന്ധി സൃഷ്ടിച്ചിരുന്നു. അതേസമയം, യുക്രെയിന്റെ തലസ്ഥാനമായ കീവിൽ നിന്ന് ഇന്ത്യക്കാരെ രക്ഷിക്കാനുള്ള ശ്രമം തുടരുകയാണ്. യുക്രെയിന്റെ പടിഞ്ഞാറ് കൂടുതൽ സുരക്ഷിതമായ സ്ഥാനത്തേക്ക് മാറാനാണ് അവസരമൊരുക്കുന്നത്. കീവിൽ നിന്ന് പടിഞ്ഞാറൻ മേഖലയായ ലിവിവിലേക്ക് ട്രെയിൻ സർവീസ് തുടങ്ങി.
ആദ്യമെത്തുന്നവർക്ക് ആദ്യം എന്ന ക്രമത്തിൽ യുക്രെയിൻ റെയിൽവേ സൗജന്യ തീവണ്ടി സർവീസ് തുടങ്ങിയെന്ന് യുക്രെയിനിലെ ഇന്ത്യൻ എംബസി ട്വീറ്റ് ചെയ്തു. തീവണ്ടി യാത്രയാണ് കൂടുതൽ സുരക്ഷിതം. പക്ഷേ എങ്ങനെ റെയിൽവേ സ്റ്റേഷനിൽ എത്തുമെന്ന ആശങ്കയിലാണ് കീവിലുള്ള വിദ്യാർത്ഥികൾ.