ഹൈദരാബാദ് : ആദ്യ സീസൺ പ്രൈം വോളിബാൾ ചാമ്പ്യൻഷിപ്പിൽ കിരീ‌ടം നേടി കൊൽക്കത്ത തണ്ടർ ബോൾട്ട്സ്.ഇന്നലെ നടന്ന ഫൈനലിൽ അഹമ്മദാബാദ് ഡിഫൻഡേഴ്സിനെ നേരിട്ടുള്ള സെറ്റുകൾക്ക് തകർത്താണ് കന്നിക്കിരീ‌ടം കൊൽക്കത്ത കൊണ്ടുപോയത്.സ്കോർ : 15-13,15-10,15-12. മലയാളിയായ സണ്ണി ജോസഫാണ് കൊൽക്കത്തയുടെ ചീഫ് കോച്ച്.സിജു ജോസഫ് അസിസ്റ്റന്റ് കോച്ചാണ്. മലയാളി താരങ്ങളായ ജിൻഷാദ്,അനു ജയിംസ്,മുഹമ്മദ് ഇഖ്ബാൽ,രാഹുൽ ,ഷമീം എന്നീ മലയാളി താരങ്ങളും ടീമിലുണ്ടായിരുന്നു. കൊൽക്കത്ത തണ്ടർബോൾട്ട്‌സിന്റെ വിനീത് കുമാർ കളിയിലെ താരമായി.

ആദ്യ സെറ്റിൽ അഹമ്മദാബാദ് തുടർച്ചയായി പിഴവുകൾ വരുത്തിയപ്പോൾ കൊൽക്കത്ത തണ്ടർബോൾട്ട്സ് 5-3ന് മുന്നിലെത്തി. വിനീത് കുമാർ മികവ് കാട്ടിയതോടെ കൊൽക്കത്ത ആധിപത്യം തുടർന്നു. 10-8ന്റെ ലീഡായി. എന്നാൽ ഷോൺ ടി ജോണിന്റെ സ്പൈക്കിലൂടെ അഹമ്മദാബാദ് തിരിച്ചടിച്ചു. 13-13ന് ഒപ്പമെത്തി. വിനീത് കുമാറിന്റെ ഉശിരൻ സെർവിലൂടെ ഒന്നാം സെറ്റ് 15-13ന് തണ്ടർബോൾട്ട്സ് നേടി.

വിനീത് കുമാറിനൊപ്പം ക്യാപ്ടൻ അശ്വൽ റായിയും കൊൽക്കത്ത തണ്ടർബോൾട്ട്‌സിനായി മിന്നിയപ്പോൾ രണ്ടാം സെറ്റില്‍ അവർ 9-5ന്റെ ലീഡ് സ്വന്തമാക്കി. പിന്നീട് രാഹുലിന്റെ ഊഴമായിരുന്നു. സൂപ്പർ പോയിന്റിന്റെ കൂടി ആനുകൂല്യത്തിൽ എതിർപ്പുകളൊന്നുമില്ലാതെ 15-10ന് സെറ്റ് നേടി കളിയിൽ തണ്ടർബോൾട്ട്സ് 2-0ന് മുന്നിലെത്തി.

മൂന്നാം സെറ്റിലും ഉശിരൻ പ്രകടനം തുടർന്ന കൊൽക്കത്ത 8-5ന് മുന്നിലെത്തി. മനോജിലൂടെ അഹമ്മദാബാദ് കളിയിൽ പിടിച്ചുനിന്നു. എന്നാൽ ഉജ്വല സ്പൈക്കുകളിലൂടെ കൊൽക്കത്ത കളംനിറഞ്ഞപ്പോൾ സ്‌കോർ 11-8 എന്ന നിലയിലായി. പിന്നാലെ അധികം വിയർക്കാതെ 15-12ന് മൂന്നാം സെറ്റും ചാമ്പ്യൻഷിപ്പും കൊൽക്കത്ത ഉറപ്പിച്ചു .

മോസ്റ്റ് വാല്യുവബിൾ പ്ലേയർ - വിനീത് കുമാർ (കൊൽക്കത്ത) .

പ്രോമിസിംഗ് പ്ളേയർ - എസ്.വി ഗുരു പ്രസാദ് (ഹൈദരാബാദ്).

ബെസ്റ്റ് സ്പൈക്കർ അംഗമുത്തു ( അഹമ്മദാബാദ് )

ബെസ്റ്റ് ബ്ലോക്കർ- ജോൺ ജോസഫ് (ഹൈദരാബാദ് )

ഫാന്റസി പ്ളേയർ - ഷോൺ ടി ജോൺ (അഹമ്മദാബാദ് )