പെരിന്തൽമണ്ണ: പെരിന്തൽമണ്ണ സബ് രജിസ്ടാർ ഓഫീസിൽ കൈക്കൂലിയായി പണം കൈപ്പറ്റുന്നുണ്ടെന്ന രഹസ്യ വിവരത്തെ തുടർന്ന് വിജിലൻസ് നടത്തിയ പരിശോധനയിൽ പണം പിടികൂടി. ഇന്നലെ വൈകീട്ട് 6.45ന് മലപ്പുറം ഡിവൈ.എസ്.പി ഫിറോസ് എം. ഷഫീഖിന്റെ നേതൃത്വത്തിൽ നടത്തിയ മിന്നൽ പരിശോധനയിൽ സബ് രജിസ്ട്രാർ സാലിഹയുടെ കൈവശം അനധികൃതമായി സൂക്ഷിച്ചിരുന്ന 28600 രൂപയും ഓഫീസ് അസിസ്റ്റന്റിന്റെ കൈയിൽ നിന്നും 2490 രൂപയും കണ്ടെടുത്തു. പരിശോധന രണ്ടുമണിക്കൂറോളം നീണ്ടു. ആധാരം രജിസ്‌ട്രേഷനുമായി ബന്ധപ്പെട്ട ക്രമക്കേടുകളും ശ്രദ്ധയിൽപ്പെട്ടിട്ടുണ്ട്. വിശദമായ റിപ്പോർട്ട് വിജിലൻസ് ഡയറക്ടർക്ക് നൽകുമെന്ന് ഡിവൈ.എസ്.പി അറിയിച്ചു. ലാൻഡ് അക്വിസിഷൻ സ്‌പെഷൽ തഹസിൽദാർ രഘുമണി, എസ്.ഐമാരായ ശ്രീനിവാസൻ, മോഹനകൃഷ്ണൻ, സലീം, പ്രജിത്, ഷിഹാബ്, ശ്യാമ എന്നിവരും പങ്കെടുത്തു.