പാലക്കാട്: തൃശൂർ ജില്ലകളെ ബന്ധിപ്പിക്കുന്ന ലെക്കിടി പാമ്പാടി റെയിൽവേ മേൽപ്പാലവും ഭാരതപ്പുഴപ്പാലവും നിർമ്മിക്കുന്നതിന്റെ ഇൻവെസ്റ്റിഗേഷൻ നടപടികൾ ആരംഭിച്ചു. മന്ത്രി കെ.രാധാകൃഷ്ണൻ സ്ഥലം സന്ദർശിച്ചു. കേരള സർക്കാർ 10 ലക്ഷം രൂപയാണ് ഇൻവെസ്റ്റിഗേഷൻ നടപടികൾക്കായി നീക്കി വെച്ചിട്ടുള്ളത്. ഇൻവെസ്റ്റിഗേഷൻ നടപടികൾ വേഗത്തിലാക്കാൻ മന്ത്രി ഉദ്യോഗസ്ഥർക്ക് നിർദ്ദേശം നൽകി. തൃശൂർ ജില്ലയിലേക്കുള്ള ഏറ്റവും പ്രധാനപ്പെട്ട പാതയാണിത്. പാലക്കാട് ജില്ലയിലെ ലെക്കിടി,​ പേരൂർ പഞ്ചായത്തിനെയും തൃശൂർ ജില്ലയിലെ തിരുവില്വാമല പഞ്ചായത്തിനെയും ബന്ധിപ്പിച്ചാണ് പാലം നിർമ്മിക്കുന്നത്. സംസ്ഥാന ബഡ്ജറ്റിൽ പാലം നിർമ്മാണത്തിനായി 50 കോടി രൂപ പ്രഖ്യാപിച്ചിരുന്നു. അഡ്വ.കെ. പ്രേംകുമാർ എം.എൽ.എ, ഒറ്റപ്പാലം ബ്ലോക്ക് പഞ്ചായത്ത് പ്രസിഡന്റ് ശോഭന പ്രസാദ്, ലക്കിടിപേരൂർ ഗ്രാമ പഞ്ചായത്ത് പ്രസിഡന്റ് കെ.സരേഷ് ജനപ്രതിനിധികൾ, രാഷ്ട്രീയ പാർട്ടി നേതാക്കൾ എന്നിവർ മന്ത്രിയോടൊപ്പം ഉണ്ടായിരുന്നു.