റാന്നി: ശബരിമല വനമേഖലയിലുൾപ്പെട്ട മഞ്ഞത്തോട്, പ്ലാപ്പള്ളി ഭാഗങ്ങളിൽ താമസിക്കുന്ന ആദിവാസികൾക്ക് ആഴ്ചയിൽ രണ്ട് തവണ കുടിവെള്ളം എത്തിക്കുന്നതിന് പട്ടിക വർഗ വകുപ്പ് നടപടി സ്വീകരിച്ചതായി അഡ്വ .പ്രമോദ് നാരായൺ എം.എൽ.എ പറഞ്ഞു. വനമേഖലയിൽ അമ്പതോളം കുടുംബങ്ങളാണ് താമസിക്കുന്നത്. ഇപ്പോൾ ഇവർ വളരെ ദൂരം സഞ്ചരിച്ചാണ് കുടിവെള്ളം എത്തിക്കുന്നത്. കുടിവെള്ള പ്രശ്നത്തിന് ശാശ്വത പരിഹാരം കാണാൻ പെരുനാട് പഞ്ചായത്ത് 15 ലക്ഷം രൂപയുടെ പദ്ധതി വിഭാവനം ചെയ്തതായി പഞ്ചായത്ത് പ്രസിഡന്റ് പി. എസ്. മോഹനൻ അറിയിച്ചു. ഇതിനായി ളാഹ വളഞ്ഞങ്ങാനം കുളം നവീകരിച്ച് ആഴം കൂട്ടും. പുതിയ മണ്ണാറക്കുളഞ്ഞി - ചാലക്കയം റോഡരികിൽ വനംവകുപ്പിന്റെ അനുമതിയോടെ കിണർ നിർമ്മിച്ച് ആദിവാസി ഊരുകളിലെ കുടിവെള്ള പ്രശ്നം പരിഹരിക്കാനും പഞ്ചായത്തിന് പദ്ധതിയുണ്ട്.