റാന്നി : വലിയകുളം മഹാദേവ ക്ഷേത്രസന്നിധിയിൽ ഭദ്രകാളി, ഗുരുദേവ പഞ്ചലോഹവിഗ്രഹ പ്രതിഷ്ഠാ കർമ്മം ഇന്ന് നടക്കും. ഭദ്രകാളി ബിംബ പ്രതിഷ്ഠയാണ് ആദ്യംനടക്കുക. രാവിലെ ഏഴിനും എട്ടിനും മദ്ധ്യേ തന്ത്രി വൈക്കം പുഷ്പദാസിന്റെ കാർമ്മികത്വത്തിൽ പ്രതിഷ്ഠാകർമ്മം നടക്കും. ഉച്ചയ്ക്ക് 12.15 നും 12.37നും മദ്ധ്യേയാണ് ഗുരുദേവ പഞ്ചലോഹ വിഗ്രഹപ്രതിഷ്ഠ നടക്കുന്നത്. ചെമ്പഴന്തി ശ്രീനാരായണ ഗുരുകുലം സെക്രട്ടറി ശുഭാംഗാനന്ദ സ്വാമികളുടെയും തന്ത്രി വൈക്കം പുഷ്പദാസിന്റെയും മുഖ്യകാർമ്മികത്വത്തിലാണ് ഗുരുദേവ പഞ്ചലോഹ വിഗ്രഹ പ്രതിഷ്ഠ നടത്തുക. ഗുരുദേവ പഞ്ചലോഹ വിഗ്രഹം സമർപ്പിച്ചത് ശ്രീനാരായണ മെഡിക്കൽ കോളേജ് കൊച്ചി ഡയറക്ടർ കൂടൽ പുത്തൻപുരയിൽ പ്രദീപ് കുമാർ തങ്കപ്പനാണ്. വൈകിട്ട് നാലിന് ക്ഷേത്രസമർപ്പണ സമ്മേളനം നടക്കും. എസ് എൻ ഡി പി യോഗം റാന്നി യൂണിയൻ ചെയർമാൻ പി.ആർ.അജയകുമാർ അദ്ധ്യക്ഷതവഹിക്കും. അഡ്വ.പ്രമോദ് നാരായണൻ എം. എൽ.എ ഉദ്ഘാടനം ചെയ്യും. ചെമ്പഴന്തി ശ്രീനാരായണ ഗുരുകുലം സെക്രട്ടറി ശുഭാംഗാനന്ദ സ്വാമികൾ ക്ഷേത്ര സമർപ്പണവും അനുഗ്രഹ പ്രഭാഷണവും നടത്തും. യോഗത്തിൽ തിരുവതാംകൂർ ദേവസ്വം ബോർഡ് പ്രസിഡന്റ് അഡ്വ.കെ.അനന്തഗോപൻ മുഖ്യാഥിതിയാകും. ശ്രീനാരായണ മെഡിക്കൽ കോളേജ് കൊച്ചി ഡയറക്ടർ പ്രദീപ് കുമാർ തങ്കപ്പൻ മുഖ്യപ്രഭാഷണം നടത്തും. റാന്നി ബ്ലോക്ക് പഞ്ചായത്ത് മെമ്പർ അഡ്വ.സിബി മാത്യു താഴത്തില്ലത്ത്, വടശേരിക്കര ഗ്രാമ പഞ്ചായത്ത് പ്രസിഡന്റ് ലതാമോഹനൻ, വാർഡ് അംഗം സ്വപ്ന സൂസൻ ജേക്കബ്, നാറാണംമൂഴി പഞ്ചായത്തംഗം സുനിൽ ചെല്ലപ്പൻ. ഗുരുധർമ്മ പ്രചാരണ സഭ ജില്ലാ പ്രസിഡന്റ് പി.എൻ. മധുസൂദൻ, പേഴുംപാറ പുത്തൻപള്ളി ജമാഅത്ത് ഇമാം മൗലവി ഷാനവാസ് അനാമി, വെച്ചൂച്ചിറ സെന്റ് ഗ്രിഗോറിയോസ്‌ ഓർത്തഡോക്സ് ചർച്ച് വികാരി ഫാ.ക്ലിമ്മീസ് എ.ജെ, വലിയകുളം മുൻ ശാഖാ പ്രസിഡന്റ് ഓ.എൻ.മധുസുദനൻ, കാക്കമാല ശ്രീസുബ്രഹ്മണ്യ ക്ഷേത്രം തന്ത്രി കൊച്ചുഗോപാല സ്വാമികൾ എന്നിവർ സംസാരിക്കും. വലിയകുളം ശാഖാപ്രസിഡന്റ് ദീപു കെ.എസ് സ്വാഗതവും സെക്രട്ടറി ടി.ടി.ഷാജി കൃതജ്ഞതയും പറയും. രാത്രി 8.30ന് നാടൻപാട്ടുകൾ.