കോന്നി: നിയോജക മണ്ഡലത്തിലെ രണ്ട് പദ്ധതികൾക്കായി 55.55 കോടി രൂപ അനുവദിക്കാൻ
കിഫ്ബി യോഗത്തിൽ തീരുമാനമായതായി കെ.യു.ജനീഷ് കുമാർ എം.എൽ.എ അറിയിച്ചു. അച്ചൻകോവിൽപ്ലാപ്പള്ളി റോഡ് നിർമ്മാണത്തിനും, കോന്നി ഗവ.മെഡിക്കൽ കോളേജ് വികസനത്തിനുമായാണ് തുക അനുവദിച്ചത്.റോഡ് നിർമ്മാണത്തിന് 36.83 കോടിയും, മെഡിക്കൽ കോളേജ് വികസനത്തിന് 18.72 കോടിയുമാണ് അനുവദിച്ചത്. അച്ചൻകോവിൽപ്ലാപ്പള്ളി റോഡ് 3 റീച്ചുകളിലാണ് പുനർനിർമ്മാണം. തണ്ണിത്തോട് ചിറ്റാർ ആദ്യ റീച്ച് 5.9 കിലോമീറ്ററാണ്.3.80 കിലോമീറ്റർ ദൂരത്തിൽ ഉറുമ്പിനി വാലുപാറ റോഡ് രണ്ടാം റീച്ചും സീതത്തോട് പാലമാണ് മൂന്നാം റീച്ചിൽ ഉൾപ്പെടുന്നത്. വനത്തിൽ കൂടി കടന്നു പോകുന്ന ഭാഗങ്ങളിൽ റോഡിന് വീതി കൂട്ടി നിർമ്മിക്കേണ്ടതുണ്ട്.10 മുതൽ 12 മീറ്റർ വരെ വീതിയിലാവും റോഡ് നിർമ്മിക്കുക. .ബി.എംആൻഡ് ബി.സി സാങ്കേതിക വിദ്യയിലാണ് റോഡ് നിർമ്മിക്കുക. സംസ്ഥാന റോഡ് ഫണ്ട് ബോർഡിന്റെ (കെ.ആർ.എഫ്.ബി) ചുമതലയിലാണ് റോഡ് നിർമ്മാണം നടത്തുന്നത്.ഗവൺമെന്റ് മെഡിക്കൽ കോളേജിൽ മെഡിക്കൽ ഉപകരണങ്ങളും ഫർണിച്ചറുകളും വാങ്ങാനും, മെഡിക്കൽ ഗ്യാസ് പൈപ്പ് ലൈൻ സിസ്റ്റം സ്ഥാപിക്കാനുമാണ് തുക അനുവദിച്ചത്. ആദ്യവർഷ എം.ബി.ബി.എസ് ക്ലാസുകൾ ആരംഭിക്കുന്നതിനുള്ള സാധന സാമഗ്രികൾക്കുള്ള തുകയാണിത്. അത്യാഹിത വിഭാഗം 2.09 കോടി രൂപ, മാതൃ, നവജാത ശിശു സംരക്ഷണം ഉൾപ്പെടെയുള്ള വിഭാഗത്തിന് 2.12 കോടി, മോഡ്യുലാർ ലാബ് 2.47 കോടി, 2 മോഡ്യുലാർ ഓപ്പറേഷൻ തീയറ്റർ 1.4 കോടി, ഓപ്പറേഷൻ തീയറ്ററിനാവശ്യമായ മെഡിക്കൽ ഗ്യാസ് പൈപ്പ് ലൈൻ സംവിധാനം 2.87 കോടി, ബ്ലഡ് ബാങ്ക് 1.15 കോടി, അനാട്ടമി, ബയോകെമിസ്ട്രി, ഫിസിയോളജി എന്നീ വിഭാഗങ്ങൾക്ക് 3.32 കോടി, മൈക്രോബയോളജി, പത്തോളജി, കമ്മ്യൂണിറ്റി മെഡിസിൻ എന്നീ വിഭാഗങ്ങൾക്കായി 1.69 കോടി, ലെക്ചർ ഹാൾ, അനാട്ടമി മ്യൂസിയം എന്നിവയ്ക്കായി 1.7 കോടി എന്നിങ്ങനെയാണ് വിവിധ വിഭാഗങ്ങൾക് അനുമതി ലഭിച്ചിരിക്കുന്നത്.

മെഡിക്കൽ കോളേജ് ആദ്യഘട്ട നിർമ്മാണം പൂർത്തിയായി

മെഡിക്കൽ കോളേജിന്റെ ആദ്യഘട്ട നിർമ്മാണം പൂർത്തിയായി. ഒപി, ഐപി, അത്യാഹിത വിഭാഗം എന്നിവ പ്രവർത്തനം ആരംഭിച്ചു. നാഷണൽ മെഡിക്കൽ കൗൺസിലിന്റെ അനുമതിയ്ക്കായി പരിശോധന പൂർത്തിയായി.

......................

റോഡ് നിർമ്മാണത്തിന് 36.83 കോടി

മെഡിക്കൽ കോളേജ് വികസനത്തിന് 18.72 കോടി