പത്തനംതിട്ട : ജില്ലയിലെ നാല് ആശുപത്രികളുടെ വികസനത്തിനായി 44.42 കോടി രൂപയുടെ നബാർഡ് ധനസഹായത്തിന് ഭരണാനുമതി നൽകിയതായി ആരോഗ്യവകുപ്പ് മന്ത്രി വീണാ ജോർജ് അറിയിച്ചു. പത്തനംതിട്ട ജനറൽ ആശുപത്രി 22.17 കോടി രൂപ, എഴുമറ്റൂർ സാമൂഹികാരോഗ്യ കേന്ദ്രം എട്ടു കോടി രൂപ, കൂടൽ കുടുംബാരോഗ്യ കേന്ദ്രം 6.62 കോടി രൂപ, മലയാലപ്പുഴ കുടുംബാരോഗ്യ കേന്ദ്രം 7.63 കോടി രൂപ എന്നിങ്ങനെയാണ് തുക അനുവദിച്ചത്.
ജില്ലയിലെ കോന്നി മെഡിക്കൽ കോളജ് ഉൾപ്പെടെ വിവിധ ആശുപത്രികളുടെ വികസനത്തിന് അടുത്തിടെ കിഫ്ബി 79.31 കോടി രൂപ അനുവദിച്ചിരുന്നു. കോന്നി മെഡിക്കൽ കോളജ് 18.72 കോടി, കോഴഞ്ചേരി ജില്ലാ ആശുപത്രി 30.35 കോടി രൂപ, റാന്നി താലൂക്ക് ആശുപത്രി 15.60 കോടി രൂപ, അടൂർ ജനറൽ ആശുപത്രി 14.64 കോടി രൂപ എന്നിങ്ങനെയാണ് തുക അനുവദിച്ചത്. ഇവയെല്ലാം പൂർത്തിയാകുന്നതോടെ ജില്ലയിൽ മികച്ച ആരോഗ്യ സേവനങ്ങൾ ലഭ്യമാകുമെന്നും മന്ത്രി വ്യക്തമാക്കി.
പത്തനംതിട്ട ജനറൽ ആശുപത്രിയുടെ ഒ.പി ബ്ലോക്ക് നിർമ്മാണത്തിന്റെ ആദ്യഘട്ടമായാണ് തുക അനുവദിച്ചത്. ആദ്യഘട്ടമായി മൂന്ന് നില കെട്ടിടമാണ് നിർമ്മിക്കുക. ഉപകരണങ്ങൾക്കും ഫർണിച്ചറുകൾക്കുമായി 1.09 കോടി രൂപയും എം.ആർ.ഐ മെഷീന് 8.28 കോടി രൂപയുമാണ് അനുവദിച്ചത്. സ്‌പെഷ്യാലിറ്റി ഒ.പികൾ, ലാബ്, ഫാർമസി എന്നിവയാണ് ഇവിടെ സജ്ജമാക്കുന്നത്.
എഴുമറ്റൂർ സാമൂഹികാരോഗ്യ കേന്ദ്രത്തിന്റെ പുതിയ ആശുപത്രി കെട്ടിടത്തിനാണ് തുക അനുവദിച്ചത്. മൂന്ന് നില കെട്ടിടമാണ് നിർമ്മിക്കുന്നത്. ഒപി ബ്ലോക്ക്, ലാബ്, ഫാർമസി, പ്രീചെക്ക് ഏരിയ, വെയിറ്റിംഗ് ഏരിയ, അഡ്മിനിസ്‌ട്രേറ്റീവ് ഓഫീസ്, പബ്ലിക്ക് ഹെൽത്ത് വിംഗ്, കോൺഫറൻസ് ഹാൾ, ഫിസിയോ തെറാപ്പി യൂണിറ്റ് എന്നിവയാണ് സജ്ജമാക്കുന്നത്.
കൂടൽ കുടുംബാരോഗ്യ കേന്ദ്രത്തിന്റെ പുതിയ കെട്ടിടത്തിനാണ് തുക അനുവദിച്ചത്. മൂന്ന് നില കെട്ടിടമാണ് നിർമ്മിക്കുന്നത്. ഉപകരണങ്ങൾ വാങ്ങുന്നതിനായി 60 ലക്ഷം രൂപയാണ് അനുവദിച്ചത്. ലാബ്, പാലിയേറ്റീവ് കെയർ റൂം, കോൺഫറൻസ് ഹാൾ, ഓഫീസ്, വിഷൻ സെന്റർ എന്നിവയുണ്ടാകും.
മലയാലപ്പുഴ കുടുംബാരോഗ്യ കേന്ദ്രത്തിന് പുതിയ രണ്ടുനില കെട്ടിടത്തിനാണ് തുക അനുവദിച്ചത്. 60 ലക്ഷം രൂപ ഉപകരണങ്ങൾക്കായുള്ളതാണ്. ഒ.പി, ലാബ്, ഫാർമസി, പ്രീ ചെക്ക് ഏരിയ, വെയിറ്റിംഗ് ഏരിയ, കോൺഫറൻസ് ഹാൾ, ഓഫീസ്, പബ്ലിക്ക് ഹെൽത്ത് വിംഗ് എന്നിവയുണ്ടാകും.