നെടുമ്പാശേരി: രാജ്യാന്തര വിമാനത്താവളം വഴി കടത്താൻ ശ്രമിച്ച ഒരു കോടിയോളം രൂപ വില വരുന്ന 1982 ഗ്രാം സ്വർണം കസ്റ്റംസ് എയർ ഇന്റലിജൻസ് വിഭാഗം പിടിച്ചെടുത്തു. എയർ അറേബ്യ വിമാനത്തിൽ ഷാർജയിൽ നിന്നെത്തിയ പത്തനംതിട്ട സ്വദേശി ലിജിൻ കൃഷ്ണനിൽ നിന്ന് 851 ഗ്രാം സ്വർണവും കോട്ടയം പൊൻകുന്നം സ്വദേശി സിദ്ധാർഥ് മധുസൂദനനിൽ നിന്ന് 1131 ഗ്രാം സ്വർണവുമാണ് പിടിച്ചത്. ഇരുവരും ശരീരത്തിൽ രഹസ്യഭാഗത്താണ് സ്വർണം ഒളിപ്പിച്ചിരുന്നത്. ഒരാഴ്ച്ചയ്ക്കിടെ മൂന്നാം തവണയാണ് വിമാനത്താവളത്തിൽ കസ്റ്റംസ് വിഭാഗം സ്വർണവേട്ട നടത്തുന്നത്. ഈ മാസം 16ന് മൂന്ന് പേരിൽ നിന്നായി ഒരു കോടി രൂപയുടെ സ്വർണവും 17ന് രണ്ട് പേരിൽ നിന്നായി 30 ലക്ഷം രൂപയുടെ സ്വർണവും പിടികൂടിയിരുന്നു.