പന്തളം : വർഷങ്ങളായി മാലിന്യനിക്ഷേപ കേന്ദ്രമായിരുന്ന കുപ്പന്നൂർ തീരത്തിന് ശാപമോക്ഷം കിട്ടിയത് നാല് വർഷം മുൻപാണ്. അന്ന് കുളനട പഞ്ചായത്തിലെ മാന്തുക വാർഡ് ഒന്നിൽ ​ ജനപ്രതിനിധി ജയചന്ദ്രന്റെ നേതൃത്വത്തിൽ വിവിധ സംഘടനകളും വ്യക്തികളും ചേർന്നുള്ള കൂട്ടായ്​മയുടെ ശ്രമ ഫലമായി മാലിന്യമുക്തമാക്കുകയായി​രുന്നു. വഴിയോര വിശ്രമകേന്ദ്രമായി മാറിയ കുപ്പന്നൂരിൽ കുട്ടികൾക്ക് വിനോദത്തിനായുള്ള റൈഡുകൾ, ഇരിപ്പിടങ്ങൾ, വിശ്രമത്തിനായുള്ള ഹട്ടുകൾ, വിവിധതരത്തിലുള്ള ചെടികളും പൂക്കളും, കുടുംബശ്രീ കഫേകൾ എന്നിവ സ്ഥാപിച്ചതോടെ കുപ്പന്നൂരിന്റെ മുഖംതന്നെ മാറി. ധാരാളം സന്ദർശകർ കുടുംബത്തോടൊപ്പം ഒഴിവു സമയങ്ങൾ ചെലവിടാനായി​ വന്നെത്തി​. ഈ കാലയളവിൽ കുപ്പന്നൂർ ചാൽ നവീകരണത്തിനായി റീ ബിൽഡ് പദ്ധതിയിൽ 2.18 കോടി രൂപ അനുവദിച്ചു. അതിന്റ പ്രവർത്തനങ്ങൾ പൂർത്തീകരണ ഘട്ടത്തി​ലാണ്. റോഡ് പണിയുമായി ബന്ധപ്പെട്ട് കെ.എസ്.ടി പി താത്കാലികമായി എടുത്തു മാറ്റിയ റൈഡ്‌​സുകളും ഹട്ടുകളും തൊട്ടപ്പുറത്തുള്ള ലയൺസ് ക്ലബ്ബ് പാർക്കിൽ ഇപ്പോൾ ഉപേക്ഷി​ച്ച നി​ലയി​ലാണ്. കുപ്പന്നൂർ വിശ്രമകേന്ദ്രം വീണ്ടും കാടുമൂടുമ്പോൾ നാട്ടുകാർ ആശങ്കയിലാണ്. വീണ്ടും കുപ്പന്നൂർ മാലിന്യ നി​ക്ഷേപകേന്ദ്രമായി​ മാറുമോയെന്നാണ് നാട്ടുകാരുടെ ആശങ്ക.