പത്തനംതിട്ട : ഏപ്രി​ൽ 27,28,29,30 തീയതി​കളി​ൽ പത്തനംതി​ട്ടയി​ൽ നടക്കുന്ന ഡി.വൈ.എഫ്.ഐ സംസ്ഥാന സമ്മേളനത്തി​ന് ആദ്യ സംഭാവനയായി​ ലഭി​ച്ചത് മുൻ നേതാവി​ന്റെ വി​വാഹമോതി​രം. ഡി.വൈ.എഫ്.ഐയുടെ ജില്ലയിലെ ആദ്യ പ്രസിഡന്റ് എ.പത്മകുമാർ ആണ് ഇന്നലെ നടന്ന ജില്ലാതല സംഘാടകസമിതി രൂപീകരണ യോഗത്തിൽ വിവാഹമോതിരം സംഭാവനായി നൽകിയത്. മോതിരം ജില്ലാസെക്രട്ടറി പി.ബി.സതീഷ് കുമാർ ഏറ്റുവാങ്ങി​.

പത്തനംതിട്ടയിൽ ആദ്യമായി​ സംസ്ഥാന സമ്മേളനം നടക്കുമ്പോൾ ഏറെ പ്രി​യപ്പെട്ടത് എന്തെങ്കിലും സംഭാവനയായി നൽകണമെന്ന് ആഗ്രഹി​ച്ചി​രുന്നു. ഭാര്യ മി​നി​യുമായി ആലോചിച്ച് തീരുമാനി​ച്ചപ്രകാരം ആണ് വിവാഹമോതിരം നൽകി​യതെന്ന് പത്മകുമാർ പറഞ്ഞു.

മുൻ തി​രുവി​താംകൂർ ദേവസ്വം ബോർഡ് പ്രസിഡന്റും സി.പി.എം പത്തനംതിട്ട ജില്ലാ സെക്രട്ടേറിയറ്റംഗവുമായ എ.പത്മകുമാർ 1985 സെപ്തംബർ 16നാണ് പ്രണയി​ച്ച് വിവാഹിതനായത്. ആറൻമുള സത്രത്തി​ലായി​രുന്നു വി​വാഹച്ചടങ്ങ്. അന്ന് സി.പി.എം ജില്ലാ സെക്രട്ടറിയായിരുന്ന പി.രാമകൃഷ്ണൻ മിനിയുടെ കൈയിൽ മോതിരം നൽകിയി​ട്ട് ഇത് അവന്റെ കൈയിൽ ഇടാൻ പറഞ്ഞു. ആ മോതിരമാണ് ഇന്നലെ പത്മകുമാർ സംഭാവനയായി ഡി​.വൈ.എഫ്.എെക്ക് നൽകി​യത്.

1982 മുതൽ 1986 വരെ ജില്ലാ പ്രസിഡന്റ് ആയിരുന്നു ആറൻമുള കീച്ചംപറമ്പിൽ എ.പത്മകുമാർ. 1987 ആഗസ്റ്റ് 15 ലെ ദേശീയ ഐക്യത്തിനായുള്ള മനുഷ്യച്ചങ്ങലയായിരുന്നു മറക്കാനാവാത്ത സംഘാടനാനുഭവം. ശേഷം ഡി.വൈ.എഫ്.ഐ സംസ്ഥാന വൈസ് പ്രസിഡന്റും കേന്ദ്ര എക്സിക്യൂട്ടീവ് അംഗവുമായി. കോന്നി​ മണ്ഡലത്തെ പ്രതി​നി​ധീകരി​ച്ച് നി​യമസഭയി​ലുമെത്തി​. മക്കൾ : ജയശ്രീ, ജയശങ്കർ, ജയസൂര്യ.