 സർക്കാരിന്റെ താങ്ങുവില പ്രകാരം എടുക്കാൻ ആളില്ല

കരുനാഗപ്പള്ളി: ഇടത്തട്ടുകാരായ കേര കർഷകരുടെ തലയി​ൽ ഇടി​ത്തീയായി​ തേങ്ങ വി​ല ഇടി​യുന്നു. ഒരു കിലോയുടെ വി​ല 22 രൂപയി​ൽ നി​ന്ന് 15ലേക്കാണ് താഴ്ന്നത്. ഈ വിലയ്ക്കു പോലും തേങ്ങ എടുക്കാൻ ആരുമെത്തുന്നി​ല്ലെന്നാണ് കേരകർഷകരുടെ പരിഭവം. തമിഴ്നാട്ടിൽ നിന്നുള്ള കൊപ്ര കോഴിക്കോട്ട് സംഭരിച്ച ശേഷം കേരള വിപണിയിൽ വിറ്റഴിക്കുന്നതാണ് പതി​വ്. ഇതും കേരളത്തിലെ നാളീകേര കർഷകരെ ബുദ്ധിമുട്ടിലാക്കുന്നു. കർഷകരെ സഹായിക്കാനായി സർക്കാർ പ്രഖ്യാപിച്ച താങ്ങുവില നിയമത്തി​ലെ നൂലാമാലകൾ കുരുക്കായതും തിരിച്ചടിയായി.

ഒരു കിലോ തേങ്ങയ്ക്ക് 32 രൂപയാണ് സർക്കാർ പ്രഖ്യാപിച്ച താങ്ങുവില. കരുനാഗപ്പള്ളിയിൽ കേരഫെഡാണ് പ്രധാന സംരംഭകർ. പ്രാഥമിക സഹകരണ സംഘങ്ങൾ തേങ്ങ സംഭരിക്കുമെന്ന് കൃഷി വകുപ്പ് പ്രഖ്യാപിച്ചിരുന്നെങ്കിലും കരുനാഗപ്പള്ളിയിലെ ഒരു സംഘം പോലും നി​ലവി​ൽ കർഷകരിൽ നിന്നു തേങ്ങ സംഭരിക്കുന്നില്ല. കാർഷിക സർവകലാശാലയുടെ നിബന്ധനകൾക്ക് വിധേയമായിട്ടാണ് കൃഷിവകുപ്പി​ന്റെ സംഭരണം. സർവകലാശാല മാനദണ്ഡ പ്രകാരം 2.5 ഏക്കറിൽ 175 തെങ്ങു മാത്രമേ പാടുള്ളൂ. 10 സെന്റി​ൽ 7 തെങ്ങുകൾ. നല്ലവണ്ണം പരിചരിക്കുന്ന തെങ്ങിൽ നിന്നു 30 തേങ്ങ ലഭിക്കുമെന്നാണ് കണക്ക്. തേങ്ങയും തെങ്ങുകളുടെ എണ്ണവും പൊരുത്തപ്പെടുന്നില്ലെങ്കിൽ അധികം വരുന്ന തേങ്ങ ഉദ്യോഗസ്ഥർ മാറ്റി വയ്ക്കും.

കേരഫെഡിലെ സ്ഥിതിയും മറിച്ചല്ല. തേങ്ങയി​ട്ട ശേഷം കർഷകർ കരമടച്ച രസീതിന്റെ കോപ്പിയുമായി കൃഷി ഭവനിൽ അപേക്ഷ നൽകണം. കൃഷി ഉദ്യോഗസ്ഥരുടെ പരിശോധനയ്ക്ക് ശേഷം കർഷകൻ തേങ്ങ കേരഫെഡിൽ എത്തി​ക്കണം. ഇവിടെയും കർക്കശ പരിശോധനയാണ്. ഈ തേങ്ങയിൽ നല്ലൊരു പങ്കും ഉദ്യോഗസ്ഥർ തിരിഞ്ഞ് മാറ്റാറുണ്ടെന്നും പരാതി​യുണ്ട്. എടുക്കുന്ന തേങ്ങയുടെ പണം ആഴ്ചകൾക്ക് ശേഷം ബാങ്ക് അക്കൗണ്ടിൽ എത്തും.

 കിട്ടുന്ന കാശിനു വിൽക്കുന്നു

നൂലാമാലകൾ നി​രവധി​യായതി​നാൽ, കേരഫെഡി​ന് ഒരിക്കൽ തേങ്ങ നൽകി​യ കർഷകൻ പി​ന്നീട് ആ വഴി​ക്ക് പോവി​ല്ല. വിലകുറഞ്ഞാലും ചെറുകിട കച്ചവടക്കാർക്ക് വി​റ്റ് കിട്ടുന്ന പണം വാങ്ങാനാണ് കർഷകർ ആഗ്രഹിക്കുന്നത്. സർക്കാരി​ന്റെ കുത്തക തേങ്ങ സംഭരണവും കർഷകർക്ക് ഗുണം ചെയ്യുന്നില്ല. കേരളത്തിലെ തെങ്ങ് കൃഷിയുമായി​ ബന്ധപ്പെട്ട കാർഷിക സർവകലാശാലയുടെ മാനദണ്ഡങ്ങൾ പുനപരിശോധിക്കണമെന്നാണ് തെങ്ങ് കർഷകരുടെ ആവശ്യം. 2.50 ഏക്കർ ഭൂമിയിൽ 250 തെങ്ങിൻ തൈകൾ നടാനാവുന്ന തരത്തിൽ നിയമം മാറ്റി എഴുതണമെന്നും കർഷകർ ആവശ്യപ്പെടുന്നു.

..................................

 തേങ്ങവില മുമ്പ്: ₹ 22

 ഇപ്പോൾ: ₹ 15

 സർക്കാർ താങ്ങുവില: ₹ 32