ഓച്ചിറ: ഇരുവൃക്കകളും തകരാറിലായതിനെത്തുടർന്ന് വൃക്ക മാറ്റിവയ്ക്കൽ ശസ്‌ത്രക്രിയയ്ക്ക് വിധേയനാകുന്ന പതിനേഴുകാരൻ ആരോമലിനായി യൂത്ത് കോൺഗ്രസ് ആലപ്പാട് മണ്ഡലം കമ്മിറ്റിയുടെ നേതൃത്വത്തിൽ ധനശേഖരണം നടത്തി. ബിരിയാണി ചലഞ്ചിലൂടെ സ്വരൂപിച്ച രണ്ട് ലക്ഷത്തി ഒമ്പതിനായിരത്തി നാനൂറ് രൂപ മണ്ഡലം പ്രസിഡന്റ് ജീദാസ്, സി.ആർ.മഹേഷ് എം.എൽ.എയ്ക്ക് കൈമാറുകയും അദ്ദേഹം അത് കുടുംബത്തിന് നൽകുകയും ചെയ്തു. വളരെ കുറച്ച് ദിവസം കൊണ്ട് ഇത്രയും തുക സ്വരൂപിച്ച യൂത്ത് കോൺഗ്രസ് ആലപ്പാട് മണ്ഡലം കമ്മിറ്റിയുടെ പ്രവർത്തനം മാതൃകാപരമെന്ന് അദ്ദേഹം അഭിപ്രായപ്പെട്ടു. ഇതൊരു ചെറിയ സഹായം മാത്രമാണ് ഇതെന്നും കഴിയുന്നവർ ആരോമലിനെ നേരിട്ട് സഹായിക്കണമെന്നും അദ്ദേഹം അഭ്യർത്ഥിച്ചു. ആലപ്പാട് പഞ്ചായത്ത് പ്രസിഡന്റ് യു.ഉല്ലാസ്, വൈസ് പ്രസിഡന്റ് ടി.ഷൈമ, യൂത്ത് കോൺഗ്രസ് നേതാക്കളായ അശ്വത് ശശി, എസ്. സുമേഷ്, അഖിൽ ദാസ് തുടങ്ങിയവർ പങ്കെടുത്തു.