കരുനാഗപ്പള്ളി : ദേശീയപാത വികസനത്തിന്റെ ഭാഗമായി കരുനാഗപ്പള്ളി നഗരത്തിൽ ഗ്രേഡ്‌ സെപ്പറേറ്റർ മാതൃകയിൽ ഉയരപ്പാത പണിയുന്നതിന്‌ പകരം ഓപ്പൺ ഫ്ലൈ ഓവർ നിർമ്മിക്കാൻ നടപടി സ്വീകരിക്കണമെന്നാവശ്യപ്പെട്ട്‌ എം.പിമാരായ അഡ്വ. എ.എം.ആരിഫ്, അഡ്വ.കെ. സോമപ്രസാദ് എന്നിവർ എൻ.എച്ച്.എ.ഐ ചെയർപേഴ്സൺ ആൽക്ക ഉപാദ്ധ്യായയെ നേരിൽകണ്ട് നിവേദനം നൽകി. കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരിക്ക്‌ ഇത് സംബന്ധിച്ച് നേരത്തെ കത്ത് നൽകിയിരുന്നു. അംഗീകരിച്ച പ്ലാൻ പ്രകാരം കരുനാഗപ്പള്ളി ഹൈസ്കൂൾ ജംഗ്ഷൻ മുതൽ ലാലാജി ജംഗ്ഷൻ വരെ എലിവേറ്റഡ്‌ ഹൈവേ നിർമ്മിച്ചാൽ നഗരം രണ്ടായി വിഭജിക്കപ്പെടുമെന്നും അത് പൊതുജനങ്ങൾക്കും കച്ചവടക്കാർക്കും ഒരുപോലെ പ്രയാസം സൃഷ്ടിക്കുമെന്നും നിവേദനത്തിൽ പറയുന്നു. ഇക്കാര്യത്തിൽ ഇടപെടണമെന്ന് ആവശ്യപ്പെട്ട് മുഖ്യമന്ത്രി, പൊതുമരാമത്ത്‌ മന്ത്രി എന്നിവർക്ക് നേരത്തെ ഇരുവരും നിവേദനം നൽകിയിരുന്നു.