കൊല്ലം: വ്യക്തി ശുചിത്വത്തിൽ ലോകത്തിനുതന്നെ മാതൃകയായ കേരളത്തിൽ സാമൂഹ്യ ശുചിത്വ അവബോധം ഏറെ താഴ്ന്ന നിലവാരത്തിലാണെന്നും അവയിൽ മുന്നേറ്റം സൃഷ്ടിച്ച് ശാസ്ത്രീയ മാലിന്യ സംസ്‌കരണത്തിലൂടെ പ്രകൃതിയെ അനുകൂലമാക്കുന്ന പദ്ധതികൾ നടപ്പാക്കണമെന്നും മന്ത്റി എം.വി. ഗോവിന്ദൻ. അമൃത് പദ്ധതിയിലുൾപ്പെടുത്തി കൊല്ലം കോർപ്പറേഷൻ കുരീപ്പുഴയിൽ നിർമ്മിക്കുന്ന മലിനജല മാലിന്യ സംസ്‌കരണ ശാലയുടെ നിർമ്മാണോദ്ഘാടനം ഓൺലൈനായി നിർവഹിക്കുകയായിരുന്നു അദ്ദേഹം. ജലവിഭവ വകുപ്പ് മന്ത്റി റോഷി അഗസ്റ്റിൻ അദ്ധ്യക്ഷനായി.
നഗരത്തിലെ സെപ്റ്റിക് മാലിന്യം ശുദ്ധജല സ്രോതസുകളുമായി കലരാനുള്ള സാദ്ധ്യത പൂർണമായും ഒഴിവാക്കുകയെന്ന ലക്ഷ്യത്തോടെ 31.91 കോടി രൂപ ചെലവഴിച്ചാണ് പ്ളാന്റ് നിർമ്മിക്കുന്നത്. ജല അതോറിട്ടിക്കാണ് പദ്ധതി നിർവ്വഹണ ചുമതല. എ.ബി.എം സിവിൽ വെഞ്ച്വർ, ഹൈഡ്രോടെക് എന്നീ കമ്പനികൾക്കാണ് നിർമ്മാണ കരാർ.
എം.എൽ.എമാരായ ഡോ.സുജിത് വിജയൻ പിള്ള, എം. നൗഷാദ്, മേയർ പ്രസന്ന ഏണസ്റ്റ്, തദ്ദേശസ്വയംഭരണ വകുപ്പ് അഡിഷണൽ ചീഫ് സെക്രട്ടറി ശാരദാ മുരളീധരൻ, ജലവിഭവ വകുപ്പ് സെക്രട്ടറി പ്രണബ് ജ്യോതിനാഥ്, കേരള ജല അതോറിട്ടി മാനേജിംഗ് ഡയറക്ടർ എസ്. വെങ്കിടേസപതി, അമൃത് നഗരകാര്യ മിഷൻ ഡയറക്ടർ രേണുരാജ്, ജല അതോറിട്ടി ടെക്‌നിക്കൽ അംഗം ജി. ശ്രീകുമാർ, ഡെപ്യുട്ടി മേയർ കൊല്ലം മധു, കോർപ്പറേഷൻ സെക്രട്ടറി പി.കെ സജീവ്, കോർപ്പറേഷൻ സ്ഥിരം സമിതി അദ്ധ്യക്ഷന്മാരായ എസ്. ഗീതാകുമാരി, എസ്. ജയൻ, യു. പവിത്ര, കൗൺസിലർമാർ, ജനപ്രതിനിധികൾ, രാഷ്ട്രീയ നേതാക്കൾ തുടങ്ങിയവർ പങ്കെടുത്തു.