കൊല്ലം: കേരളാ ബാങ്ക് കുടിശിക നിവാരണ അദാലത്തിൽ അപേക്ഷ സമർപ്പിച്ച 52 പേർക്ക് 87,17,671 രൂപയുടെ ഇളവ് അനുവദിച്ചു. ജില്ലയിൽ കേരളാ ബാങ്കിന്റെ വിവിധ ശാഖകളിൽ നിന്ന് വായ്പയെടുത്തവർക്കാണ് ആനുകൂല്യം ലഭിച്ചത്.

കൊവിഡും പ്രളയക്കെടുതിയും മൂലം യഥാസമയം വായ്പ തിരിച്ചടയ്ക്കാൻ കഴിയാത്തവർക്ക് സംസ്ഥാന സർക്കാർ പ്രഖ്യാപിച്ച നവകേരളീയം ഒറ്റത്തവണ തീർപ്പാക്കൽ പദ്ധിതിയിലുൾപ്പെടുത്തിയാണ് കേരളാ ബാങ്ക് ഓഡിറ്റോറിയത്തിൽ അദാലത്ത് നടന്നത്.

ഈ സാമ്പത്തിക വർഷം ഇതുവരെ 7.25 കോടി രൂപയുടെ വായ്പാ ഇളവാണ് ജില്ലയിലെ സഹകാരികൾക്ക് അനുവദിച്ചിട്ടുള്ളത്.

ബാങ്ക് ഡയറക്ടർ അഡ്വ. ജി.ലാലുവിന്റെ നേതൃത്വത്തിൽ നടന്ന അദാലത്തിൽ ഡെപ്യൂട്ടി ജനറൽ മാനേജർ പി.എസ്. ഗിരീഷ് കുമാർ, ആർബിട്രേറ്റർ കം അസിസ്റ്റന്റ് രജിസ്ട്രാർ കെ. ജയകുമാർ, സീനിയർ മാനേജർമാരായ കെ.വി. സ്മിത, ആർ.എസ്. ബിന്ദു, മാനേജർ ജി. ഓമനക്കുട്ടൻ തുടങ്ങിയവർ പങ്കെടുത്തു.