കൊല്ലം: കോർപ്പറേഷൻ കൗൺസിൽ യോഗത്തിൽ അജണ്ട വായിക്കാതെ, വി​ഷയങ്ങൾ പാസായെന്ന് മേയർ പ്രഖ്യാപിച്ചത് ഭരണ, പ്രതി​പക്ഷ വാക്കേറ്റത്തിൽ കലാശിച്ചു.

ഇന്നലെ നടന്ന കൗൺസിൽ യോഗത്തിൽ 2013- 14 സാമ്പത്തിക വർഷത്തെ തെരുവ് വിളക്ക് പരിപാലനവുമായി ബന്ധപ്പെട്ട വിഷയമാണ് വി​വാദമായത്.ബി.ജെ.പി പാർലമെന്ററി പാർട്ടി നേതാവ് ടി.ജി. ഗിരീഷ് സംസാരിച്ചുതുടങ്ങിയതോടെ മേയർ ഇടപെട്ടു. തുടർന്ന് ഇരുവരും തമ്മിൽ പത്തുമിനിട്ടോളം തർക്കത്തിലായി​. വി​ഷയം മറ്റ് കൗൺസിലർമാർ ഏറ്റെടുത്തതോടെ കൗൺസിൽ യോഗം ബഹളത്തി​ലായി​ .

തെരുവുവിളക്ക് പരിപാലനവുമായി ബന്ധപ്പെട്ട് വൈദ്യുതി നിരക്കിന്റെ 30 ശതമാനം നൽകാമെന്ന വ്യവസ്ഥയിൽ തൂണുകളിൽ പരസ്യം പതിക്കാൻ കൊല്ലത്തെ സ്വകാര്യ ഏജൻസിയുമായി കോർപ്പറേഷൻ കരാറിലേർപ്പെട്ടിരുന്നു. എന്നാൽ നി​രക്കി​ൽ വർദ്ധനവുണ്ടായപ്പോൾ കരാറുകാരുമായി​ തർക്കമുണ്ടാകുകയും തുടർന്ന് അവർ കരാറിൽ നിന്ന് പിന്മാറുകയും ചെയ്തു. പദ്ധതി നടത്തിപ്പിൽ ഓഫർ ഉണ്ടായിട്ടും അതിന് വിരുദ്ധമായി കരാറുണ്ടാക്കി കോർപ്പറേഷന് 1.10 കോടി​ നഷ്ടമുണ്ടായെന്ന് ഓഡി​റ്റ് വകുപ്പ് കണ്ടെത്തുകയും വീഴ്ച വരുത്തി നഷ്ടമുണ്ടാക്കിയതിനാൽ മേയർ, സെക്രട്ടറി, സൂപ്രണ്ടിംഗ് എൻജിനീയർ, കൗൺസിൽ അംഗങ്ങൾ എന്നിവരിൽ നിന്നു തുക ഈടാക്കണമെന്നും നിർദ്ദേശമുണ്ടായിരുന്നു. തുക ഈടാക്കുന്നതിൽ നിന്നൊഴിവാകാനായി ഓഡിറ്റ് ഒബ്ജക്ഷൻ ഒഴിവാക്കാനാണ് അജണ്ടയിൽ ഉൾപ്പെടുത്തിയത്. എന്നാൽ ഇത് കൗൺസിലിൽ വായിക്കാതി​രുന്നതാണ് തർക്കത്തി​നി​ടയാക്കി​യത്.

ബഹളത്തെ തുടർന്ന് അരമണിക്കൂറോളം കൗൺസിൽ യോഗം തടസപ്പെട്ടു. പി​ന്നീട് ബി.ജെ.പി അംഗങ്ങളുടെ വിയോജിപ്പ് രേഖാമൂലം എഴുതിനൽകി. ധാർഷ്ട്യം നിറഞ്ഞ സമീപനമാണ് മേയർ തുടരുന്നതെന്ന് പ്രതിപക്ഷ കൗൺസിലർമാർ ആരോപിച്ചു.