തൃശൂർ : നെടുമ്പാശേരി വിമാനത്താവളത്തിലെ ആർ.ടി.പി.സി.ആർ പരിശോധനാ നിരക്ക് കുറയ്ക്കണമെന്ന് മുഖ്യമന്ത്രിക്ക് പ്രധാനമന്ത്രിയുടെ ഓഫീസ് നിർദേശം നൽകി. കെ.പി.സി.സി സെക്രട്ടറി ഷാജി കോടങ്കണ്ടത്ത് നൽകിയ പരാതിയിലാണ് നടപടി. വിഷയത്തിൽ തീരുമാനം എടുക്കേണ്ടത് മുഖ്യമന്ത്രിയുടെ ഓഫീസായതിനാൽ അടിയന്തര തീരുമാനം എടുക്കാൻ നിർദ്ദേശിച്ച് മുഖ്യമന്ത്രിയുടെ ഓഫീസിലേക്ക് പരാതി അയച്ചിട്ടുണ്ടെന്നും പരാതിയിലെ കാര്യങ്ങളുടെ അനന്തര നടപടികൾക്കായി ജോയിന്റ് സെക്രട്ടറി റോബർട്ട് ഫ്രാൻസിസിനെ ചുമതലപ്പെടുത്തിയതായും ഷാജി കോടങ്കണ്ടത്ത് പറഞ്ഞു. നെടുമ്പാശേരി വിമാനത്താവളത്തിൽ റാപ്പിഡ് ആർ.ടി.പി.സി.ആർ ടെസ്റ്റിന് 2490 രൂപയാണ് ഈടാക്കുന്നത്. എന്നാൽ ഇതേ ടെസ്റ്റിന് കോഴിക്കോട് എയർപോർട്ടിൽ 1380രൂപയാണ് ഈടാക്കുന്നത്. നെടുമ്പാശേരി എയർപോർട്ടിൽ റാപ്പിഡ് ആർ.ടി.പി.സി.ആർ പരിശോധനയുടെ പേരിൽ കോടികളാണ് പിരിച്ചെടുക്കുന്നതെന്ന് ഷാജി കോടങ്കണ്ടത്ത് ആരോപിച്ചു.