വടക്കാഞ്ചേരി: ലൈഫ് മിഷൻ വിവാദവുമായി ബന്ധപ്പെട്ട സ്വപ്ന സുരേഷിന്റെ വെളിപ്പെടുത്തലുകൾ സുപ്രീം കോടതിയുടെ ശ്രദ്ധയിൽ കൊണ്ടുവരുമെന്ന് മുൻ എം.എൽ.എ അനിൽ അക്കര. ലൈഫ് മിഷനിൽ ലഭിച്ച കമ്മീഷൻ വിദേശത്തേക്ക് കടത്തിയ ഈജിപ്ഷ്യൻ പൗരൻ ഖാലിദിനെ അറസ്റ്റ് ചെയ്താൽ മാത്രമേ കേസ് തെളിയൂ. സ്വപ്നയുടെ വെളിപ്പെടുത്തലോടെ വടക്കാഞ്ചേരി ലൈഫ് മിഷൻ ഫ്‌ളാറ്റ് വിവാദത്തിൽ തട്ടിപ്പ് നടന്നുവെന്ന് വ്യക്തമായി. അടിയന്തരമായി ഇക്കാര്യം സുപ്രീം കോടതിയുടെ ശ്രദ്ധയിൽപ്പെടുത്തും. കേസ് പെട്ടെന്ന് പരിഗണിക്കണമെന്ന് ആവശ്യപ്പെട്ട് കോടതിയിൽ അപേക്ഷ നൽകും. ലൈഫ് മിഷനിലെ കമ്മീഷൻ അന്നത്തെ മന്ത്രിമാർ ഈജിപ്ഷ്യൻ പൗരനായ ഖാലിദ് വഴിയാണ് വിദേശത്തേക്ക് കടത്തിയത്. ഖാലിദിനെ അറസ്റ്റ് ചെയ്യാതെ ഈ കേസ് തെളിയില്ല. കേന്ദ്ര ഏജൻസികൾ ഇക്കാര്യത്തിൽ നടപടികൾ സ്വീകരിക്കണമെന്നും അനിൽ അക്കര കൂട്ടിച്ചേർത്തു.