ചെറുതുരുത്തി: കേരള കലാമണ്ഡലത്തിന്റെയും പുരസ്‌കാര സമിതിയുടെയും സംയുക്താഭിമുഖ്യത്തിൽ കപ്ലിക്കാടൻ കഥകളിയുടെ പ്രമുഖ ആചാര്യനും പ്രസിദ്ധ നടനും കേരള കലാമണ്ഡലം ഭരണസമിതി അംഗവുമായിരുന്ന പത്മഭൂഷൻ മടവൂർ വാസുദേവൻ നായർ അനുസ്മരണവും നാലാമത് അവാർഡ് സമർപ്പണവും ഈ മാസം 12ന് വൈകീട്ട് 4 ന് പഴയ കലാമണ്ഡലത്തിൽ വച്ച് നടക്കും. കലാമണ്ഡലം വൈസ് ചാൻസലർ ഡോ. ടി.കെ. നാരായണൻ സമ്മേളനം ഉദ്ഘാടനം ചെയ്യും. കഥകളി നടൻ ഡോ. സദനം കൃഷ്ണൻകുട്ടിക്ക് പത്മശ്രീ കലാമണ്ഡലം ഗോപി പുരസ്‌കാരം സമ്മാനിക്കും. ചടങ്ങിൽ കലാമണ്ഡലം പ്രസിദ്ധീകരിച്ച മടവൂർ വാസുദേവൻ നായരുടെ ആത്മകഥയായ ഗുരുപ്രസാദം പ്രകാശനം ചെയ്യുമെന്ന് പുരസ്‌കാര സമിതി സെക്രട്ടറി കലാമണ്ഡലം രാജശേഖരൻ അറിയിച്ചു.