കുന്നംകുളം: ഉന്നത വിദ്യാഭ്യാസ വകുപ്പ്, പൊതു വിദ്യാഭ്യാസ വകുപ്പ് എന്നിവയുടെ സംയുക്താഭിമുഖ്യത്തിലുള്ള അഡീഷണൽ സ്‌കിൽ അക്വിസിഷൻ പ്രോഗ്രാമിന്റെ (അസാപ്) സംസ്ഥാനത്തെ 16 കമ്യൂണിറ്റി സ്‌കിൽ പാർക്കുകളിൽ കുന്നംകുളം കമ്യൂണിറ്റി സ്‌കിൽ പാർക്കിന്റെ നിർമ്മാണം അന്തിമഘട്ടത്തിൽ. നിർമ്മാണ പുരോഗതി വിലയിരുത്തുന്നതിന് കുന്നംകുളം എം.എൽ.എ എ.സി. മൊയ്തീൻ സ്‌കിൽ പാർക്ക് സന്ദർശിച്ചു. നഗരസഭാ ചെയർപേഴ്‌സൺ സീതാ രവീന്ദ്രൻ, സ്റ്റാൻഡിംഗ് കമ്മിറ്റി ചെയർമാൻ പി.എം. സുരേഷ്, ജില്ലാ പ്രോഗ്രാം മനേജർ ടിയാര സന്തോഷ് തുടങ്ങിയവരും എം.എൽ.എയോടൊപ്പം ഉണ്ടായിരുന്നു.
മെഷിനെറികൾക്കായി വാക്വം ഡീവാറ്റേർഡ് ഫ്‌ളോറിംഗോടു കൂടിയ മുറികളിൽ മതിയായ വ്യാവസായിക ആവശ്യങ്ങൾക്കായിട്ടുളള വൈദ്യുതി സോക്കറ്റുകളും ഗ്യാസ്, ജല സൗകര്യം, വൈദ്യുതി കണക്ഷൻ മുതലായവയും സജ്ജീകരിച്ചിട്ടുണ്ട്. തിയറി ക്ലാസുകൾക്കായി തയ്യാറാക്കിയിട്ടുളള ലൈബ്രറി റൂം ഉൾപ്പെടെയുളള 5 ക്ലാസ് മുറികളിൽ 2 ക്ലാസുകളിൽ വെള്ളവും ഡ്രെയിനേജ് സൗകര്യവും ഏർപ്പെടുത്തിയിട്ടുണ്ട്. ചില നൈപുണ്യ കോഴ്‌സുകൾക്ക് പ്രൊജക്ടർ സൗകര്യം വേണമെന്നതിനാൽ എല്ലാ ക്ലാസ് മുറികളിലും പ്രൊജക്ടർ സൗകര്യവും അതിനുവേണ്ടുന്ന ശബ്ദ സൗകര്യവും ഒരുക്കിയിട്ടുണ്ട്. 30 കമ്പ്യൂട്ടറുകൾ ഉൾക്കൊള്ളാൻ കഴിയുന്ന ശീതീകരിച്ച കമ്പ്യൂട്ടർ ലാബും അതിനോട് ചേർന്ന് സെർവർ റൂമും ഉൾക്കൊളളിച്ചിട്ടുണ്ട്. ആധുനിക സജ്ജീകരണങ്ങളോടു കൂടിയ മീറ്റിംഗ് റൂമും ഫാക്കൽറ്റിക്കും അഡ്മിനിസ്‌ട്രേഷനുമായി പ്രത്യേകം മുറികളും ഒരുക്കിയിട്ടുണ്ട്.
മൂന്ന് നിലകളിലും ടോയ്‌ലറ്റ് ഉണ്ട്. രണ്ടു നിലകളിൽ ഡ്രസിംഗ് റൂം ഉൾപ്പെടുത്തിയിട്ടുണ്ട്. ഭിന്നശേഷിക്കാർക്കായി പ്രത്യേക ടോയ്‌ലറ്റ് സൗകര്യം ഉൾപ്പെടെ അവർക്ക് ആവശ്യമായ റാമ്പ്, ലിഫ്റ്റ് എന്നിവയുമുണ്ടാകും. ഓറിയന്റേഷൻ എന്നിവയ്ക്കായി 150 പേർക്ക് ഒരേ സമയം മീറ്റിംഗിൽ പങ്കെടുക്കാൻ കഴിയുന്ന മീറ്റിംഗ് ഹാളും ഇവിടെ ഉണ്ട്.
66000 ലിറ്റർ ശേഷിയുള്ള ഭൂഗർഭ മഴവെള്ള സംഭരണിയും 30000 ലിറ്റർ ശേഷിയുള്ള ശുദ്ധജല സംഭരണിയും 15000 ലിറ്റർ ശേഷിയുള്ള ഓവർഹെഡ് ടാങ്ക്, അഗ്‌നി ശമന സംവിധാനങ്ങൾ, ജനറേറ്റർ, പാസഞ്ചർ ലിഫ്റ്റ്, ട്രാൻസ്‌ഫോർമർ എന്നിവയും ഒരുക്കിയിട്ടുണ്ട്.

പാർക്ക് എ.ഡി.ബിയുടെ സാമ്പത്തിക സഹായത്തോടെ
വിദ്യാഭ്യാസത്തിനൊപ്പം തൊഴിൽ നൈപുണ്യത്തിനും അവസരമൊരുക്കുന്ന കമ്യൂണിറ്റി സ്‌കിൽ പാർക്ക് എ.ഡി.ബിയുടെ സാമ്പത്തിക സഹായത്തോടെ കുന്നംകുളം ഗവ. മോഡൽ ബോയ്‌സ് ഹയർ സെക്കൻഡറി സ്‌കൂൾ ഗ്രൗണ്ടിനോട് ചേർന്ന ഒരേക്കർ സ്ഥലത്താണ് നിർമ്മാണം പുരോഗമിക്കുന്നത്. 14 കോടി രൂപയാണ് നിർമ്മാണ ചെലവ്. മൂന്ന് നിലകളിലായി 29000 ചതുരശ്ര അടി വിസ്തീർണമുള്ളതാണ് കെട്ടിടം.