കാട്ടൂർ പഞ്ചായത്തിൽ ഡിജിറ്റൽ പേയ്മെന്റ് സംവിധാനം ആരംഭിച്ചു

കാട്ടൂർ: പഞ്ചായത്തിൽ പൊതുജന സേവനാർത്ഥം ആരംഭിച്ച ഡിജിറ്റൽ പേയ്മെന്റ് സംവിധാനത്തിന്റെ ഉദ്ഘാടനം ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡന്റ് ലളിത ബാലൻ നിർവഹിച്ചു. സൗത്ത് ഇന്ത്യൻ ബാങ്ക് കാട്ടൂർ ശാഖയുമായി സഹകരിച്ചാണ് സംവിധാനം ഒരുക്കിയിട്ടുള്ളത്. പഞ്ചായത്തിലെ സേവനങ്ങൾക്ക് നൽകേണ്ട തുകകൾ ഇനി മുതൽ ബാങ്ക് ഡെബിറ്റ്/ക്രെഡിറ്റ് കാർഡുകൾ ഉപയോഗിച്ചോ, മൊബൈൽ ഫോൺ വഴിയോ നൽകാം. ഇതിനായി സ്വൈപ്പിംഗ് മെഷീൻ, ബാർകോഡ് എന്നിവ ഫ്രണ്ട് ഓഫീസിൽ ഒരുക്കിയിട്ടുണ്ട്.

പേപ്പർ ലെസ് പഞ്ചായത്ത് എന്ന ആശയത്തിന്റെ ഭാഗമായി ഡിജിറ്റൽ പ്ലാറ്റ്ഫോമിലേക്ക് പൂർണമായി മാറുന്നതിന്റെ ഭാഗമായാണ് ഇത്തരം സംവിധാനം ഒരുക്കിയിട്ടുള്ളതെന്ന് പഞ്ചായത്ത് പ്രസിഡന്റ് ഷീജ പവിത്രൻ അറിയിച്ചു. സേവനങ്ങൾ മുഴുവൻ ഓൻലൈനിൽ ലഭ്യമാകുന്ന പദ്ധതി പഞ്ചായത്തിൽ നേരത്തെ ആരംഭിച്ചിരുന്നു. പഞ്ചായത്ത് പ്രസിഡന്റ് ഷീജ പവിത്രൻ അദ്ധ്യക്ഷയായി. വൈസ് പ്രസിഡന്റ് സി.സി. സന്ദീപ്, സെക്രട്ടറി എം.എച്ച്. ഷാജി, ബ്ലോക്ക് പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി അദ്ധ്യക്ഷ സുനിത മനോജ്, പഞ്ചായത്ത് വികസനകാര്യ സ്റ്റാൻഡിംഗ് കമ്മിറ്റി അദ്ധ്യക്ഷ ടി.വി. ലത, സ്റ്റാൻഡിംഗ് കമ്മിറ്റി അദ്ധ്യക്ഷൻമാർ, പഞ്ചായത്തംഗങ്ങൾ, പഞ്ചായത്ത് ജീവനക്കാർ എന്നിവർ സംസാരിച്ചു.

കാട്ടൂർ പഞ്ചായത്തിൽ ആരംഭിച്ച ഡിജിറ്റൽ പേയ്മെന്റ് സംവിധാനത്തിന്റെ ഉദ്ഘാടനം ഇരിങ്ങാലക്കുട ബ്ലോക്ക് പ്രസിഡന്റ് ലളിത ബാലൻ നിർവഹിക്കുന്നു.