കൊടകര: നാഷണൽ ട്രാൻസ്‌പോർട്ടേഷൻ പ്ലാനിംഗ് ആൻഡ് റിസർച്ച് സെന്ററും (നാറ്റ്പാക്ക്) സഹൃദയ എൻജിനീയറിംഗ് കോളേജും സഹകരിച്ച് പ്രവർത്തിക്കും. വിദ്യാർത്ഥികളുടെ പ്രൊജക്ടുകൾ, ഗവേഷണം, നാറ്റ്പാക്കിന്റെ വിവിധ സർവേകൾ, ലാബുകളിലെ പരിശീലനം, വിദ്യാർത്ഥികളുടെ ഇന്റേൺഷിപ്പ് തുടങ്ങി വിവിധ രംഗങ്ങളിലാണ് സഹൃദയയും നാറ്റ്പാക്കുമായി സഹകരണം. ഇതുവഴി സഹൃദയയിലെ സിവിൽ എൻജിനീയറിംഗ് വിദ്യാർത്ഥികൾക്ക് പഠനത്തോടൊപ്പം പരിശീലനവും മികച്ച വരുമാനവും ലഭ്യമാകും. സർക്കാർ അംഗീകൃത മെറ്റീരിയൽ ടെസ്റ്റ് ലാബ്, വെള്ളത്തിന്റെ ഗുണ നിലവാര പരിശോധനാ ലാബ്, കെട്ടിടങ്ങളുടെ മാസ്റ്റർ പ്ലാൻ, സ്ട്രക്ചറൽ ഡിസൈൻ, മണ്ണ് പരിശോധന ലാബ്, സർവെ തുടങ്ങി നിരവധി വിഭാഗങ്ങൾ സഹൃദയയിൽ പ്രവർത്തിക്കുന്നുണ്ട്. നാറ്റ്പാക്ക് സീനിയർ സയന്റിസ്റ്റ് വി.എസ്. സജ്ഞയ് കുമാറും സഹൃദയ എക്‌സി. ഡയറക്ടർ ഫാ.ജോർജ് പാറേമാനും പങ്കാളിത്ത പത്രിക കൈമാറി. പ്രിൻസിപ്പൽ ഡോ.നിക്‌സൻ കുരുവിള, സിവിൽ വിഭാഗം മേധാവി ഡോ. എം. ദൃശ്യ തുടങ്ങിയവർ ചടങ്ങിൽ പങ്കെടുത്തു.