കൊടകര: സംസ്ഥാനത്തെ വിദ്യാലയങ്ങൾ മുഴുവൻ സമയപ്രവർത്തനത്തിനായി സജ്ജീകരിക്കുന്നതിന്റെ ജില്ലാതല ഉദ്ഘാടനം കൊടകര ഗവ. നാഷണൽ ബോയ്‌സ് ഹൈസ്‌കൂളിൽ നടന്നു. ജില്ലാ പഞ്ചായത്ത് പ്രസിഡന്റ് പി.കെ. ഡേവിസ് ഉദ്ഘാടനം നിർവഹിച്ചു. കൊടകര പഞ്ചായത്ത് പ്രസിഡന്റ് അമ്പിളി സോമൻ അദ്ധ്യക്ഷയായി. ജില്ലാ പഞ്ചായത്തംഗം സരിത രാജേഷ്, ബ്ലോക്ക് പഞ്ചായത്ത് ക്ഷേമകാര്യ സ്ഥിരംസമിതി അദ്ധ്യക്ഷ ടെസി ഫ്രാൻസിസ്, പഞ്ചായത്ത് വിദ്യാഭ്യാസകാര്യ സ്ഥിരംസമിതി അദ്ധ്യക്ഷ ദിവ്യ ഷാജു, വാർഡ് അംഗം സി.ഡി.സിബി, ഹയർ സെക്കൻഡറി കോ-ഓർഡിനേറ്റർ വി.എം. കരീം, പൊതു വിദ്യാഭ്യാസ സംരക്ഷണ യജ്ഞം കോ-ഓർഡിനേറ്റർ, പി.എ. മുഹമ്മദ് സിദ്ദിഖ്, ചാലക്കുടി എ.ഇ.ഒ കെ.വി. പ്രദീപ്, കൊടകര ബി.പി.സി കെ.നന്ദകുമാർ, കൊടകര ഗവ.ഗേൾസ് ഹൈസ്‌കൂൾ പ്രിൻസിപ്പൽ ടി.വി. ഗോപി, പി.ടി.എ പ്രസിഡന്റ് കെ.സി. ജെയിംസ്, പ്രധാനാദ്ധ്യാപിക പി.പി.മേരി തുടങ്ങിയവർ സംസാരിച്ചു. വിദ്യാലയത്തിന് സാനിറ്റൈസറും മാസ്‌കും കൈമാറി. വിദ്യാലയങ്ങളിലെ ക്ലാസ്സ് മുറികളും പരിസരവും വൃത്തിയാക്കുന്നതും അണുവിമുക്തമാക്കുന്നതുമായ പ്രവർത്തനങ്ങൾ ആരംഭിച്ചു. ത്രിതല പഞ്ചായത്തുകളുടെയും അദ്ധ്യാപക രക്ഷാകർത്തൃ സമിതികളുടെയും കുടുംബശ്രീയുടെയും നേതൃത്വത്തിലാണ് പ്രവർത്തനങ്ങൾ ആസൂത്രണം ചെയ്തിരിക്കുന്നത്.