ചേർപ്പ്: ആറാട്ടുപുഴ പൂരത്തിന് നെടുനായകത്വം വഹിക്കുന്ന തൃപ്രയാർ തേവർക്ക് നിലകൊള്ളാൻ കൈതവളപ്പിന് സമീപം ഉയർത്തുന്ന തേവർ പന്തലിന് കാൽ നാട്ടി. ക്ഷേത്രം മേൽശാന്തി നടുവത്ത്മന പ്രശാന്ത് നമ്പൂതിരിയുടെ ഭൂമിപൂജയോടെയാണ് ചടങ്ങുകൾ ആരംഭിച്ചത്.

ആലിലകളും മാവിലകളും ചാർത്തിയ കവുങ്ങ് കൊച്ചിൻ ദേവസ്വം ബോർഡ് പ്രസിഡന്റ് വി. നന്ദകുമാർ, ബോർഡ് മെമ്പർ എം.ജി. നാരായണൻ, പെരുവനം - ആറാട്ടുപുഴ പൂരം സെൻട്രൽ കമ്മിറ്റി പ്രസിഡന്റ് എ.എ. കുമാരൻ, തിരുവഞ്ചികുളം അസി. കമ്മിഷണർ കെ. സുനിൽ കർത്ത , ആറാട്ടുപുഴ ദേവസ്വം ഓഫീസർ പി.യു. നന്ദകുമാർ, പങ്കാളി ക്ഷേത്രം ഭാരവാഹികൾ, ആറാട്ടുപുഴ ക്ഷേത്രോപദേശക സമിതി അംഗങ്ങൾ എന്നിവർ ചേർന്നാണ് ഉയർത്തിയത്.

ബഹുനില വർണ്ണപ്പന്തലിന്റെ നിർമ്മാണം ആറാട്ടുപുഴ എം. കൃഷ്ണകുമാറും ദീപാലങ്കാരം തിരൂർ ക്ലാസിക്ക് സൗണ്ടിന്റെ ഗോപാലകൃഷ്ണനുമാണ് നിർവഹിക്കുന്നത്. പ്രസിഡന്റ് എം. മധു, സെക്രട്ടറി അഡ്വ. കെ. സുജേഷ്, ട്രഷറർ എം. ശിവദാസൻ, വൈസ് പ്രസിഡന്റ് എ.ജി. ഗോപി , ജോ. സെക്രട്ടറി സുനിൽ പി. മേനോൻ, ഓഡിറ്റർ പി. രാജേഷ് എന്നിവർ പന്തൽ കാൽനാട്ടുചടങ്ങുകൾക്ക് നേതൃത്വം നൽകി.

ആറാട്ടുപുഴ ക്ഷേത്രോപദേശക സമിതിയുടെ നേതൃത്വത്തിലാണ് പന്തലിന്റെ നിർമ്മാണപ്രവൃത്തികൾ പുരോഗമിക്കുന്നത്.