തിരുവനന്തപുരം: മുഖ്യമന്ത്രിക്കും മന്ത്രി ആർ.ബിന്ദുവിനുമെതിരായ രണ്ടു കേസുകൾ ഇന്ന് ലോകായുക്ത പരിഗണിക്കുമ്പോൾ സർക്കാരിന് ഇന്ന് നിർണായക ദിനം. കണ്ണൂർ സർവകലാശാലാ വൈസ്ചാൻസലറായി ഡോ. ഗോപിനാഥ് രവീന്ദ്രനെ പുനർനിയമിക്കണമെന്ന് ആവശ്യപ്പെട്ട് മന്ത്രി ബിന്ദു ഗവർണർക്ക് കത്തുകൾ നൽകിയത് സ്വജനപക്ഷപാതവും അഴിമതിയുമാണെന്ന് ചൂണ്ടിക്കാട്ടി രമേശ് ചെന്നിത്തല നൽകിയ ഹർജിയിൽ ഇന്ന് വിധി പറയും. മുഖ്യമന്ത്രിയുടെ ദുരിതാശ്വാസ നിധി ദുരുപയോഗിച്ചെന്ന് ചൂണ്ടിക്കാട്ടിയുള്ള ഹർജിയിൽ ഇന്ന് അന്തിമവാദം കേൾക്കും. മന്ത്രിസഭായോഗ തീരുമാനത്തിന്റേതടക്കമുള്ള രേഖകൾ ഹാജരാക്കാൻ സർക്കാരിന് നിർദ്ദേശം നൽകിയിട്ടുണ്ട്.