തിരുവനന്തപുരം: കെ.എസ്.ആർ.ടി.സി ജീവനക്കാരുടെ പരിഷ്‌കരിച്ച ശമ്പളം 10 നകം വിതരണം ചെയ്യുമെന്ന് സി.എം.ഡി അറിയിച്ചു. ഇ - ഓഫീസ് കഴിഞ്ഞ മാസം 25 മുതൽ പ്രവർത്തന രഹിതമായതും സ്‌പാർക്കിൽ അതിനനുസരിച്ചുള്ള ഭേദഗതി വരുത്താനുള്ള കാലതാമസം കണക്കിലെടുത്തുമാണ് ശമ്പളം വൈകുന്നത്. സ്‌പാർക്കിന്റെ ഭേദഗതിയിൽ അനിശ്ചിതത്വം നിലനിൽക്കുന്ന സാഹചര്യത്തിൽ അതാത് യൂണിറ്റ് ഓഫീസർമാർ ജീവനക്കാരുടെ ശമ്പളം പുനർനിർണയിച്ച് നാളെ വൈകിട്ട് 3ന് മുമ്പായി ചീഫ് ഓഫീസിൽ എത്തിക്കാൻ നിർദ്ദേശം നൽകിയിട്ടുണ്ട്. ഇത് ലഭിക്കുന്ന മുറയ്‌ക്ക് ശമ്പളം നൽകാനാകുമെന്നാണ് പ്രതീക്ഷയെന്നും പുതുക്കിയ സ്‌കെയിലുള്ള ശമ്പള നിർണയത്തിൽ എന്തെങ്കിലും പിശക് കണ്ടെത്തിയാൽ അത് പരിഹരിച്ച് തുടർന്നുള്ള മാസത്തെ ശമ്പളത്തിൽ ക്രമീകരിച്ച് നൽകുമെന്നും സി.എം.ഡി അറിയിച്ചു.