തിരുവനന്തപുരം: കൊവിഡ് കാലത്ത് ബ്രിട്ടനിൽ മുൻനിര പോരാളിയായിരുന്ന മലയാളി ഡോക്ടർക്ക് ബി.സി.എ പുരസ്കാരം.

ഗായിക ചിത്ര അയ്യരുടെ സഹോദരിയും സി.പി.സി.ആർ.ഐ.യിലെ സീനിയർ സയന്റിസ്റ്റുകളായിരുന്ന കൊല്ലം തഴവ വെങ്ങാട്ടമ്പള്ളിൽ ഡോ. ആർ.ഡി. അയ്യരുടെയും ഡോ. രോഹിണി അയ്യരുടെയും മകളുമായ ഡോ. രമഅയ്യരാണ് (47)​ പുരസ്കാരത്തിന് അർഹയായത്.

കൊവിഡ് പ്രതിരോധത്തിലും രോഗീ പരിപാലനത്തിലും ബോധവത്കരണത്തിനുമുള്ള മികവിനാണ് പുരസ്കാരം. മംഗലാപുരം മെഡിക്കൽ കോളേജിൽ നിന്ന് എം.ബി.ബി.എസ് പൂർത്തിയാക്കിയ ഡോ. രമ സ്ത്രീകളിലെ കാൻസറുമായി ബന്ധപ്പെട്ട പഠനത്തിനായി ആറുവർഷം മുമ്പാണ് ബ്രിട്ടനിലെത്തിയത്.

ബ്രിട്ടനിലെ ഈസ്റ്റ് കെന്റ് ഹോസ്‌പിറ്റൽസ് യൂണിവേഴ്സിറ്റിയിലാണ് റിസർച്ചും ചികിത്സയും നടത്തുന്നത്. ക്വീൻ എലിസബത്ത് ക്വീൻ മദർ ആശുപത്രിയിൽ ജോലി ചെയ്തിരുന്ന രമയ്ക്ക് ആരോഗ്യമേഖലയിലെ സേവനങ്ങൾക്ക് എൻ.എച്ച്.എസ്,​ ജി.കെ.ടി സ്‌കൂൾ ഒഫ് മെഡിക്കൽ എഡ്യുക്കേഷൻ പുരസ്കാരങ്ങളും ലഭിച്ചിട്ടുണ്ട്. യു.കെയിലെ ഗില്ലിംഗ് ഹാമിലാണ് താമസം. ബ്രിട്ടനിൽ ഡോക്ടറായ മലേഷ്യൻ പൗരൻ മുരളിയാണ് ഭർത്താവ്.