തിരുവനന്തപുരം: വനിതകൾക്ക് സ്വയംതൊഴിൽ കണ്ടെത്താനും സംരംഭങ്ങൾ ആരംഭിക്കാനും മഹിളാശക്തി സ്വയംതൊഴിൽ സഹായവായ്പാ പദ്ധതിക്ക് കേരളബാങ്ക് തുടക്കമിട്ടു. സഹകരണസംഘങ്ങൾ മുഖേനയാണ് വായ്പ നൽകുക. സംഘങ്ങളിൽ അംഗങ്ങളായ സ്ത്രീകൾക്ക് ഒറ്റയ്ക്കോ ഗ്രൂപ്പുകളായോ സ്വയംതൊഴിൽ ആരംഭിക്കാൻ വായ്പ അനുവദിക്കും. കൂടാതെ വനിതാസഹകരണസംഘങ്ങൾ നേരിട്ട് നടത്തുന്ന സംരംഭങ്ങൾക്ക് വർക്കിംഗ് കാപിറ്റൽ കാഷ് ക്രെഡിറ്റ്, സ്വർണ്ണപ്പണയ കാഷ് ക്രെഡിറ്റ് എന്നിവയും കേരളാബാങ്ക് വഴി നൽകും. സ്വയംസഹായസംഘങ്ങളിലും കുടുംബശ്രീകളിലും അംഗങ്ങളായ സ്ത്രീകൾക്ക് മഹിളാ ശക്തി വിഭാഗത്തിൽപ്പെട്ട വായ്പകൾ, വിവിധതരം ചെറുകിട സംരംഭവായ്പകൾ, ഭക്ഷ്യസംസ്‌കരണ സൂക്ഷ്മ വ്യവസായ വായ്പകൾ എന്നിവയ്ക്ക് അർഹതപ്പെട്ട മേഖലകളിൽ കേന്ദ്ര സംസ്ഥാന സർക്കാരും നബാർഡും അനുവദിക്കുന്ന പലിശ ഇളവിന് അർഹത ഉണ്ടായിരിക്കും.

 മഹിളാശക്തി വായ്പകൾ

(സംരംഭം,വായ്പയുടെ പേര്, തുക എന്നീ ക്രമത്തിൽ)
 ഫുഡ് കാറ്ററിംഗ് ബിസിനസ് നടത്താൻ - അന്നപൂർണ്ണ വായ്പ - 10,00,00

 ബിസിനസ് സംരംഭങ്ങളെ പ്രോത്സാഹിപ്പിക്കുന്നതിന് - ബിസിനസ് വനിത വായ്പ, - 50,00,00

 ബ്യൂട്ടിപാർലർ, ട്യൂഷൻ, തയ്യൽ, ഡേ കെയർ തുടങ്ങി ചെറുകിട സംരംഭങ്ങൾക്ക് - വനിത മുദ്ര വായ്പ - 20,00,00

 സർക്കാർ സംരംഭങ്ങളുടെ ഭാഗമായുള്ള ബിസിനസിന് - വനിത വികസന വായ്പ - പദ്ധതിയുടെ 50%

 പാവപ്പെട്ട വീടുകളിലെ സ്ത്രീകൾക്ക് സ്വയംസംരംഭത്തിന് - ഉദ്യോഗിനി വായ്പാ പദ്ധതി - 10,00,00

 ഗ്രാമീണ മേഖലയിലെ വനിതകളുടെ പദ്ധതികൾക്ക് - വനിതാ ശക്തികേന്ദ്ര പദ്ധതി - 50,000 രൂപ