ആറ്റിങ്ങൽ: ആറ്റിങ്ങൽ കരിച്ചയിൽ ശ്രീഗണേശോത്സവ ടെംപിൾ ട്രസ്റ്റിന്റെയും ഗണേശോത്സവ സമിതിയുടെയും നേതൃത്വത്തിൽ ക്ഷേത്ര സന്ദേശ പ്രയാണം 13ന് കന്യാകുമാരി ദേവീ ക്ഷേത്രത്തിൽ നിന്നും ആരംഭിക്കുമെന്ന് ഭാരവാഹികൾ അറിയിച്ചു. 13ന് രാവിലെ 10.30ന് കന്യാകുമാരി അയ്യപ്പ സേവാ സമാജം ഓർഗനൈസർ നാച്ചിൽ രാജ ട്രസ്റ്റ് ചെയർമാൻ വക്കം അജിത്തിന് പ്രയാണ പതാക കൈമാറി ഉദ്ഘാടനം ചെയ്യും. 1008 ക്ഷേത്രങ്ങളിൽ സന്ദർശനം നടത്തും. ക്ഷേത്രങ്ങളെയും ക്ഷേത്ര ഭാരവാഹികളെയും ഒത്ത് ചേർക്കുവാനുള്ള പ്രവർത്തന ലക്ഷ്യങ്ങളുമായിട്ടാണ് പ്രയാണം. എല്ലാ ക്ഷേത്രങ്ങളിലും ആദ്യാത്മിത പഠന ക്ലാസ്സുകൾ സംഘടിപ്പിക്കക. യോഗ ധ്യാനം പൂജാ പഠനം ജ്യോതിഷം വാസ്തുശാസ്ത്രം തുടങ്ങിയ എല്ലാ വിധ ശാസ്ത്ര വിഷയങ്ങളും പരിശീലിപ്പിക്കുവാനുള്ള സൗകര്യങ്ങൾ സജ്ജമാക്കുക,​ ക്ഷേത്ര കലകളെയും കലാകാരൻമാരെയും നിലനിർത്തുവാനും പരിപോക്ഷിപ്പിക്കുവാനുമുള്ള പദ്ധതികൾ നടപ്പാക്കുക എന്നിവയാണ് പ്രയാണത്തിന്റെ ലക്ഷ്യം. 1008 ക്ഷേത്രങ്ങളിൽ നിന്നും ഒരു പിടിമണ്ണ് വീതം ശേഖരിച്ച് അത് ഉപയോഗിച്ച് നിർമ്മിക്കുന്ന ഗണേശ വിഗ്രഹം ഗണേശോത്സവത്തിന് വർക്കല പാപനാശം കടവിൽനിമജ്ജനം ചെയ്യുമെന്നും ഭാരവാഹികൾ പറഞ്ഞു.

കന്യാകുമാരി കടപ്പുറത്ത് നിന്നും ആരംഭിക്കുന്ന പ്രയാണം ആറ് മാസം കൊണ്ട് വർക്കല പാപനാശം കടപ്പുറത്ത് സമാപിക്കുന്ന വിധത്തിലാണ് ക്രമീകരിച്ചിരിക്കുന്നത്. പ്രയാണത്തിന് ട്രസ്റ്റ് ഭാരവാഹികളായ ഡോ. ജയരാജു (മുൻ അനർട്ട് ഡയറക്ടർ),​ ക്ഷേത്ര തന്ത്രി കിഴക്കില്ലം രാജേഷ് നമ്പൂതിരി, സംഗീത സംവിധായകൻ പാർത്ഥസാരഥി, വി.ടി.ആർ. ശർമ്മ (മേൽശാന്തി കാപാലിശ്വരം ക്ഷേത്രം)​,ആറ്റിങ്ങൽ രാധാമണിയമ്മ, ജ്യോതിഷദൂഷണം മനോജ് ഗോപിനാഥ്, സന്ധ്യ ടീച്ചർ, ജ്യോതിഷ ഭൂഷണം ഉദയ സിംഹൻ പോറ്റി, ഗോപാലകൃഷ്ണൻ (ഇരിക്കും കുടി മാരിയമ്മൻ ക്ഷേത്രം കാര്യദർശി), ബൈജു സദാശിവൻ, പി. രാമചന്ദ്രൻ, വൈശാഖ് പോങ്ങനാട്, രാജേഷ് കൊടുവഴന്നൂർ, വഞ്ചിയൂർ രതീഷ്‌, വക്കം സുനു, ആനത്തലവട്ടം അനി ബാൽ, കല്ലമ്പലം സജി, തെറ്റി കുളം അനിൽ, രംഗൻ ശാർക്കര,​ കടയ്ക്കാവൂർ രതീഷ് എന്നിവർ നേതൃത്വം നൽകും.