തിരുവനന്തപുരം: ശക്തി കുറഞ്ഞ മഴ സംസ്ഥാനത്ത് ഒരാഴ്ച കൂടി തുടരും. തെക്കൻ ജില്ലകളിലാകും മഴ കൂടുതലായി ലഭിക്കുക. തിരുവനന്തപുരം, കൊല്ലം ജില്ലകളിലാണ് വരും ദിവസങ്ങളിൽ കൂടുതൽ മഴയ്‌ക്ക് സാദ്ധ്യതയുള്ളത്. ബംഗാൾ ഉൾക്കടലിൽ നിന്നുള്ള കിഴക്കൻ തരംഗത്തിന്റെ സ്വാധീനത്തിൽ കൂടുതൽ ഈർപ്പം കലർന്ന മേഘങ്ങൾ കേരളത്തിന് അഭിമുഖമായി സഞ്ചരിക്കുന്നുണ്ട്. ഇതിന്റെ സ്വാധീനത്തിലാണ് മഴ ലഭിക്കുന്നത്. ഇന്നലെ തിരുവനന്തപുരത്ത് ശക്തമായ മഴ ലഭിച്ചതും ഇതേത്തുടർന്നാണ്. ഇന്ന് തെക്കൻ ജില്ലകളിൽ വൈകുന്നേരങ്ങളിൽ നേരിയ മഴ ലഭിക്കും. ഇവിടങ്ങളിലെ മലയോര മേഖലകളിലായിരിക്കും കൂടുതൽ മഴ ലഭിക്കുക. ചിലയിടങ്ങളിൽ ഇടിമിന്നലിനും സാദ്ധ്യതയുണ്ട്. അടുത്തയാഴ്ച വടക്കൻ കേരളത്തിലും ഇടത്തരം മഴയ്ക്ക് സാദ്ധ്യതയുണ്ട്. എന്നാൽ സംസ്ഥാനത്തെ താപനിലയിൽ കാര്യമായ മാറ്റമുണ്ടാകില്ലെന്നും വിദഗ്ദ്ധർ പറയുന്നു. കേരള തീരത്ത് കാറ്റിന് ചെറിയ തോതിൽ ശക്തി കൂടിയിട്ടുണ്ടെങ്കിലും മത്സ്യബന്ധനത്തിന് തടസമില്ല.