തിരുവനന്തപുരം: കഴിഞ്ഞ പിണറായി വിജയൻ സർക്കാരിന്റെ കാലത്ത് കെ.എസ്.ഇ.ബിക്ക് കോടികളുടെ ബാദ്ധ്യതയുണ്ടാക്കിയെന്ന ചെയർമാൻ ഡോ. ബി.അശോകിന്റെ ആരോപണങ്ങൾ അന്വേഷിക്കണമെന്ന് ബി.ജെ.പി സംസ്ഥാന അദ്ധ്യക്ഷൻ കെ. സുരേന്ദ്രൻ ആവശ്യപ്പെട്ടു. ആരോപണം ഒന്നാം പിണറായി സർക്കാരിന്റെ അഴിമതികളിലേക്ക് വിരൽ ചൂണ്ടുന്നതാണ്. ഒന്നാം മൻമോഹൻസിംഗ് സർക്കാരിന്റെ കാലത്ത് നടന്ന അഴിമതികളെല്ലാം പുറത്ത് വന്നത് രണ്ടാം യു.പി.എ സർക്കാരിന്റെ കാലത്തായിരുന്നു. അതേ മാതൃകയാണ് ഇടത് സർക്കാരും പിന്തുടരുന്നത്. അഴിമതിയെക്കുറിച്ച് മുഖ്യമന്ത്രി മറുപടി പറയണം. വൈദ്യുതി മന്ത്രിയുടേത് കുറ്റകരമായ മൗനമാണ്. കെ.എസ്.ഇ.ബി ചെയർമാനെ മുൻ മന്ത്രി എം.എം. മണി ഭീഷണിപ്പെടുത്തുന്നത് മടിയിൽ കനമുള്ളത് കൊണ്ടാണ്.