കിളിമാനൂർ: ഒറ്റയ്ക്ക് താമസിക്കുന്ന വൃദ്ധയുടെ വീട്ടിൽ നിന്ന് ഒരുലക്ഷം രൂപയും സ്‌മാർട്ട് ഫോണും കവർന്നയാളെ കിളിമാനൂർ പൊലീസ് അറസ്റ്റുചെയ്‌തു. നിരവധി മോഷണ കേസുകളിലെ പ്രതിയായ വാമനാപുരം ആനാകുടി വി.വി ഭവനിൽ ബാഹുലേയനാണ് (65) പിടിയിലായത്.

സംഭവത്തെക്കുറിച്ച് പൊലീസ് പറയുന്നത്: ജനുവരി 23ന് പഴയകുന്നുമ്മൽ പോളച്ചിറയിൽ റിട്ട അദ്ധ്യാപിക സുമതിയുടെ ശ്രീനിലയം വീട്ടിലാണ് മോഷണം നടന്നത്. സുമതി വീടിന് പുറത്ത് ജോലിചെയ്യുന്ന സമയം മോഷ്ടാവ് പിറകുവശത്ത് കൂടി അകത്തുകടന്ന് ഇവരുടെ ഫോണും അലമാരയിൽ സൂക്ഷിച്ചിരുന്ന പണവും കവരുകയായിരുന്നു.

ഫോൺ കാണാതായതിനെ തുടർന്നുള്ള അന്വേഷണത്തിലാണ് പണവും നഷ്ടമായെന്ന് മനസിലായത്. സുമതിയുടെ പരാതിയെ തുടർന്നുള്ള അന്വേഷണത്തിലാണ് ഇയാളെ പിടികൂടിയത്. മോഷ്ടിച്ച പണം ഉപയോഗിച്ച് പ്രതി ബൈക്ക് വാങ്ങിയതായും പൊലീസിനോട് സമ്മതിച്ചിട്ടുണ്ട്.

കിളിമാനൂർ സി.ഐ എസ്. സനൂജ്, എസ്.ഐ വിജിത്ത് കെ. നായർ, എ.എസ്.ഐമാരായ ഷാജു, ഷജീം, സി.പി.ഒമാരായ ഷാജി, പ്രദീപ്, റിയാസ്, സോജു എന്നിവരടങ്ങിയ സംഘമാണ് പ്രതിയെ അറസ്റ്റുചെയ്തത്. പ്രതിയെ റിമാൻഡ് ചെയ്‌തു.