തിരുവനന്തപുരം: ശബരിമലയിൽ തെലുങ്കുനടൻ ചിരഞ്ജീവിക്കൊപ്പം ദർശനത്തിനെത്തിയത് യുവതിയല്ലെന്ന് തിരുവിതാംകൂർ ദേവസ്വം ബോർഡ് പ്രസിഡന്റ് എ. അനന്തഗോപൻ പറഞ്ഞു. കുംഭമാസപൂജയ്‌ക്ക് ദർശനത്തിനെത്തിയ ചിരഞ്ജീവിക്കൊപ്പം ഒരു യുവതിയും ദർശനം നടത്തിയെന്ന് ചിത്രങ്ങൾ സഹിതം ചിലർ

നടത്തിയ പ്രചാരണത്തോട് പ്രതികരിക്കുകയായിരുന്നു അദ്ദേഹം.

കുപ്രചാരണത്തിന് പിന്നിൽ കുബുദ്ധികളാണ്. ദർശനം നടത്തിയ ഇന്ദുമതി ചുക്കാപ്പള്ളിക്ക് 56 വയസുണ്ട്. ആധാർ കാർഡ് പ്രകാരം 1966 ആണ് ജനന വർഷം. ആളുകളെ കണ്ട് പ്രായം നിശ്ചയിച്ച് പ്രചാരണം നടത്തുന്നതും അനാവശ്യ വിവാദം ഉണ്ടാക്കുന്നതും ശബരിമല പോലെയുള്ള ഒരു തീർത്ഥാടന കേന്ദ്രത്തെ അപമാനിക്കുന്നതാണ്. അയ്യപ്പഭക്തർക്കിടയിൽ തെറ്റിദ്ധാരണയുണ്ടാക്കാനും ജനങ്ങൾക്കിടയിൽ ആശങ്കയുണ്ടാക്കാനുമാണ് ഇത്തരക്കാർ ശ്രമിക്കുന്നത്.

എന്തെങ്കിലും വിവാദമുണ്ടാക്കി മോശമായി ചിത്രീകരിക്കാൻ ആരെങ്കിലും ആഗ്രഹിച്ചാൽ അതുനടക്കില്ല. ഇതിൽ പൊലീസ് അന്വേഷണം ഉണ്ടാകുമെന്നാണ് കരുതുന്നതെന്നും അദ്ദേഹം പറഞ്ഞു. ഹൈദരാബാദ് ആസ്ഥാനമായ ഫീനിക്‌സ് ഗ്രൂപ്പ് ചെയർമാൻ സുരേഷ് ചുക്കാപ്പള്ളിയുടെ ഭാര്യയാണ് ഇന്ദുമതി ചുക്കാപ്പള്ളി.