ആറ്റിങ്ങൽ: ആറ്റിങ്ങൽ കെ.എസ്.ആർ.ടി.സി ഡിപ്പോയിൽ നിന്ന് സിറ്റി ഷട്ടിൽ സർവീസുകൾ ആരംഭിച്ചു. യാത്രാക്ലേശം പരിഹരിക്കുന്നതിന്റെ ഭാഗമായി നഗരത്തിലെ എല്ലാ സർക്കാർ ഓഫീസുകളെയും തമ്മിൽ ബന്ധിപ്പിക്കുന്ന തരത്തിലുള്ള സർവീസുകളാണ് ക്രമീകരിച്ചിട്ടുള്ളത്.

സിറ്റി ഷട്ടിൽ സർവീസുകളുടെ ഫ്ലാഗ് ഓഫ് ഒ.എസ്. അംബിക എം.എൽ.എ നിർവഹിച്ചു. കഴക്കൂട്ടം,​ മെഡിക്കൽ കോളേജ്,​ സ്റ്റാച്യു വഴി തിരുവനന്തപുരത്തേക്കും തിരിച്ചുമുള്ള സർവീസുകളാണ് നടത്തുന്നത്. കെ.എസ്.ആർ.ടി.സിയുടെ പ്രതിസന്ധി പരിഹരിക്കുന്നതിനാണ് ഈ പദ്ധതി നടപ്പാക്കുന്നതെന്ന് ചീഫ് ട്രാഫിക് ഓഫീസർ മനേഷ്.ആർ പറഞ്ഞു.

അംഗപരിമിതർക്ക് ബസിൽ കയറാനായി സംഭാവനയായി ലഭിച്ച വീൽ ചെയർ എം.എൽ.എ ഏറ്റുവാങ്ങി ഡിപ്പോയ്ക്ക് കൈമാറി. ചീഫ് ട്രാഫിക് ഓഫീസർ മനീഷ്. ആർ,​ആർ.ടി.ഒ രാജേഷ്, കൺട്രോളിംഗ് ഇൻസ്പെക്ടർ ഷാജി എന്നിവർ പങ്കെടുത്തു.