ന്യൂഡൽഹി: മണിപ്പൂരിൽ എൻ.ബീരേൻ സിംഗും ഗോവയിൽ പ്രമോദ് സാവന്തും മുഖ്യമന്ത്രിമാരാകും. ഇത് സംബന്ധിച്ച് ദേശീയ നേതൃത്വം അന്തിമ തീരുമാനത്തിലെത്തിയെന്നാണ് വിവരം.

കഴിഞ്ഞ രണ്ട് ദിവസങ്ങളിൽ പ്രധാനമന്ത്രിയുടെ ഔദ്യോഗിക വസതിയിൽ ബി.ജെ.പിയുടെ ഉന്നത നേതാക്കൾ, അതത് സംസ്ഥാനങ്ങളിലെ പ്രധാന ഭാരവാഹികൾ എന്നിവർ പങ്കെടുത്ത യോഗത്തിലാണ് ഇക്കാര്യം തീരുമാനിച്ചതെന്ന് അറിയുന്നു. ഹോളിക്ക് ശേഷം ഇരുവരും സത്യപ്രതിജ്ഞ ചെയ്ത് അധികാരമേൽക്കും.

2017 മുതൽ 2022 വരെ ബീരേൻ സിംഗ് മണിപ്പൂരിൽ മുഖ്യമന്ത്രിയായിരുന്നു. പ്രമോദ് സാവന്ത് 2019 മുതലാണ് മുഖ്യമന്ത്രിയായി അധികാരമേറ്റെടുക്കുന്നത്. ഇന്നലെ ഇരുവരും വെവ്വേറെ പ്രധാനമന്ത്രിയെ സന്ദർശിച്ചിരുന്നു. ഇക്കാര്യം നരേന്ദ്ര മോദി ട്വീറ്റ് ചെയ്യുകയും ഗോവയിലും മണിപ്പൂരിലും വീണ്ടും ജനങ്ങളെ സേവിക്കാനുള്ള അവസരം പാർട്ടിക്ക് നൽകിയതിന് നന്ദി അറിയിക്കുകയും ചെയ്തിരുന്നു.

ഗോവയിൽ വിശ്വജിത്ത് റാണയും മണിപ്പൂരിൽ മുൻ കോൺഗ്രസ് അദ്ധ്യക്ഷൻ കൂടിയായ കോതൗജം ഗോവിന്ദ സിംഗ്, ബിശ്വജിത്ത് സിംഗ് എന്നിവരും മുഖ്യമന്ത്രി സ്ഥാനത്തേക്ക് പരിഗണിക്കപ്പെട്ടിരുന്നു.