ന്യൂഡൽഹി​: കൊവി​ഡ് കാരണം അവസരം നഷ്‌ടമായവർക്കായി​ സി​വി​ൽ സർവീസ് മെയി​ൻ പരീക്ഷ വീണ്ടും നടത്താനാകി​ല്ലെന്ന് യു.പി​.എസ്.സി​ സുപ്രീംകോടതി​യെ അറി​യി​ച്ചു. രോഗം, അപകടം തുടങ്ങി​യ കാരണങ്ങളാൽ പരീക്ഷ എഴുതാൻ കഴി​യാത്തവർക്കായി​ പുന:പരീക്ഷ നടത്തുന്ന പതി​വി​ല്ലെന്നും യു.പി​.എസ്.സി​ വ്യക്തമാക്കി​.

സി​വി​ൽ സർവീസിന് അടക്കം ഒരു വർഷം യു.പി​.എസ്.സി നടത്തുന്ന 13 പരീക്ഷകളൊന്നും വീണ്ടും നടത്തുന്ന പതിവില്ല. സർക്കാർ ഒഴിവുകൾ നികത്തേണ്ട ഭരണഘടനാ ബാദ്ധ്യതയുള്ളതിനാൽ പരീക്ഷകൾ സമയബന്ധിതമായി നടത്തേണ്ടതുണ്ട്. അതിനാൽ മുൻകൂട്ടി തയ്യാറാക്കിയ കൃത്യമായ ഷെഡ്യൂൾ പ്രകാരമാണ് പരീക്ഷകളുടെ നടത്തിപ്പ്. പുന:പരീക്ഷ നടത്തേണ്ടി വന്നാൽ മറ്റു പരീക്ഷാ ഷെഡ്യൂളുകളും മൂല്യ നിർണയവും ഫലപ്രഖ്യാപനവുമെല്ലാം അവതാളത്തിലാക്കും. പല തലത്തിലുള്ള ചോദ്യങ്ങൾ നൽകേണ്ടി വരുന്നതും സാങ്കേതിക പ്രശ്നങ്ങളുണ്ടാക്കുമെന്നും യു.പി.എസ്.സി അറിയിച്ചു.