കൊച്ചി: ട്വന്റി 20 പ്രവർത്തകൻ ദീപുവിനെ മ‌ർദ്ദിച്ചു കൊലപ്പെടുത്തിയ കേസ് സി.ബി.ഐ അന്വേഷിക്കണമെന്ന് കേരള സ്റ്റേറ്റ് ഹരിജൻ സമാജം. കേരളവുമായി ബന്ധമില്ലാത്ത സി.ബി.ഐ ഉദ്യോഗസ്ഥരെ അന്വേഷണത്തി​ന് നി​യോഗി​ക്കണം. പി.വി. ശ്രീനിജിൻ എം.എൽ.എയുടെയും സി.പി.എം ജില്ലാ നേതാക്കളുടെയും ഫോൺ രേഖകൾ പരിശോധിക്കണമെന്നും സമാജം രക്ഷാധികാരി എം.കെ. കുഞ്ഞോൽ പത്രസമ്മേളനത്തിൽ ആവശ്യപ്പെട്ടു. എസ്‌.സി എസ്.ടി വിഭാഗങ്ങൾക്കെതിരെ സി.പി.എം സർക്കാർ അക്രമം അഴിച്ചു വിടുകയാണ്. കിഴക്കമ്പലത്ത് സമാജത്തി​ന്റെ നേതൃത്വത്തിൽ സമരപരിപാടികൾ ആരംഭിക്കുമെന്നും ഭാരവാഹികൾ അറിയിച്ചു. സംസ്ഥാന പ്രസിഡന്റ് വി.കെ. വേലായുധൻ, ജന. സെക്രട്ടറി എം.കെ. അംബേദ്കർ എന്നിവർ പത്രസമ്മേളനത്തിൽ പങ്കെടുത്തു.