ആലുവ: എടത്തല അൽ അമീൻ കോളേജ് തിരഞ്ഞെടുപ്പുമായി ബന്ധപ്പെട്ട് നൊച്ചിമ ഗവ. ഹൈസ്കൂൾ ഗ്രൗണ്ടിൽ എസ്.എഫ്.ഐ അനധികൃതമായി ഓഫീസ് നിർമ്മിച്ചതായി പരാതി. പ്രദേശത്തെ പ്രാദേശിക സി.പി.എം നേതാക്കളുടെ ഒത്താശയോടെയാണ് ഗവ. സ്കൂൾ ഗ്രൗണ്ട് കൈയേറി ഓഫീസ് നിർമ്മിക്കുകയും കൊടി തോരണങ്ങൾ സ്ഥാപിക്കുകയും ചെയ്തതെന്നാണ് പരാതി.

സ്കൂളിൽ നിന്നും 400 മീറ്ററോളം മാറി അൽ അമീൻ കോളേജിനോട് ചേർന്നാണ് സ്കൂൾ ഗ്രൗണ്ട്. ഈ സൗകര്യം മുതലെടുത്താണ് കൈയേറ്റം. അനധികൃതമായി സ്കൂൾ ഗ്രൗണ്ടിൽ നിർമ്മിച്ച എസ്.എഫ്.ഐ ഓഫീസ് പൊളിച്ച് നീക്കണമെന്നാവശ്യപ്പെട്ട് കെ.എസ്.യു ആലുവ ബ്ലോക്ക് ജനറൽ സെക്രട്ടറി ഹാഫിസ് ഹമീദ് നൊച്ചിമ സ്‌കൂൾ അധികൃതർക്ക് പരാതി നൽകി. അതേസമയം, കൈയേറ്റം അറിഞ്ഞിരുന്നില്ലെന്നും പരാതി ലഭിച്ച ഉടൻ ഷെഡ് പൊളിച്ച് നീക്കാൻ ബന്ധപ്പെട്ടവർക്ക് നിർദ്ദേശം നൽകിയിട്ടുണ്ടെന്നും സ്കൂൾ ഹെഡ്മിസ്ട്രസ് സുമ 'കേരളകൗമുദി'യോട് പറഞ്ഞു.