കോതമംഗലം : 2022 മാർച്ചിലെ താലൂക്ക് വികസന സമിതിയോഗം ആന്റണി ജോൺ എം.എൽ.എയുടെ അദ്ധ്യക്ഷതയിൽ മിനി സിവിൽ സ്റ്റേഷൻ ഹാളിൽ നടന്നു. കോട്ടപ്പടി, കീരംപാറ പഞ്ചായത്തുകളിലെ രൂക്ഷമായ വന്യമൃഗശല്യം നേരിടുന്നതിന് അടിയന്തര നടപടി സ്വീകരിക്കുന്നതിന് വനംവകുപ്പിന് എം.എൽ.എ യോഗത്തിൽ നിർദ്ദേശം നൽകി. റഷ്യ-യുക്രെയിൻ യുദ്ധംമൂലം കുടുങ്ങിക്കിടക്കുന്ന ഇന്ത്യൻ വിദ്യാർത്ഥികളെ സുരക്ഷിതമായി നാട്ടിൽ എത്തിക്കുന്നതിനുള്ള ശ്രമങ്ങൾ ഊർജ്ജിതമായി നടക്കുന്നുണ്ടെന്നും കോതമംഗലം താലൂക്ക് പ്രദേശത്തുനിന്നുള്ള ഏകദേശം നാല്പതോളം വിദ്യാർത്ഥികളിൽ കുറച്ചു പേരെ ഇതിനകം നാട്ടിലെത്തിക്കാനായെന്നും ബാക്കിയുള്ളവർക്കായി അടിയന്തര നടപടികൾ സ്വീകരിച്ചു വരികയാണെന്നും എം.എൽ. എ അറിയിച്ചു. കൂടാതെ കുടിവെള്ളക്ഷാമം നേരിടുന്ന കോട്ടപ്പടി,വാരപ്പെട്ടി പഞ്ചായത്ത് പ്രദേശങ്ങളിൽ വെള്ളം ലഭ്യമാക്കുന്നതിനുള്ള നടപടികൾ സ്വീകരിക്കണമെന്നും നിർദ്ദേശം നൽകി. പഞ്ചായത്ത് പ്രസിഡന്റുമാർ, ജില്ലാ പഞ്ചായത്ത് അംഗങ്ങൾ, രാഷ്ട്രീയ പാർട്ടി പ്രതിനിധികൾ, തഹസിൽദാർ, വിവിധ വകുപ്പ് ഉദ്യോഗസ്ഥർ എന്നിവർ യോഗത്തിൽ പങ്കെടുത്തു.