തൃക്കാക്കര: ലൈംഗികപീഡന പരാതിയെത്തുടർന്ന് യുവസംവിധായകൻ ലിജുകൃഷ്ണയെ ഇൻഫോപാർക്ക് പൊലീസ് അറസ്റ്റുചെയ്തു. ഷൂട്ടിംഗ് പുരോഗമിക്കുന്ന ചിത്രമായ പടവെട്ട് സംവി​ധാനം ചെയ്യുന്നത് ലി​ജുവാണ്. ഈ സിനിമയുടെ കണ്ണൂർ മട്ടന്നൂരി​ലെ ലൊക്കേഷനിൽനിന്നാണ് ലിജുവി​നെ കസ്റ്റഡിയിൽ എടുത്തത്.

ഇൻസ്റ്റഗ്രാംവഴി പരി​ചയപ്പെട്ടാണ് കാക്കനാട് കരി​മക്കാട് താമസി​ക്കുന്ന കൊട്ടാരക്കര സ്വദേശിയും സോഫ്റ്റ്‌വെയർ എൻജി​നിയറുമായ യുവതി ലിജുവുമായി അടുക്കുന്നത്. വിവാഹവാഗ്‌ദാനം നൽകി 2020 ജൂണിൽ കാക്കനാട് കളക്ടറേറ്റിന് സമീപത്തെ അപ്പാർട്ട്മെന്റിലും ഡിസംബറിൽ എടത്തലയിലെ ഹോട്ടലിലും 2021 ജൂണിൽ കണ്ണൂരുളള ലിജുവിന്റെ വീട്ടിലും വച്ച് പീഡിപ്പിച്ചതായി​ യുവതി വനി​താ അഭി​നേതാക്കളുടെ സംഘടനയായ ഡബ്ള്യു.സി.സി ക്ക് കൊടുത്ത പരാതിയി​ൽ പറയുന്നു. പരാതി ഡബ്‌ള്യു.സി.സി കമ്മിഷണർക്ക് കൈമാറി​. ഡബ്‌ള്യു.സി.സി ഭാരവാഹി​കളായ ഗീതു മോഹൻദാസ്, പാർവതി എന്നിവരുടെ മൊഴി ഇൻഫോപാർക്ക് പൊലീസ് രേഖപ്പെടുത്തി. പ്രതിയെ ഇന്ന് കോടതിയിൽ ഹാജരാക്കും.
സണ്ണി വെയിൻ ആദ്യമായി നിർമ്മി​ക്കുന്ന ചിത്രമാണ് പടവെട്ട്. മലബാറിന്റെ പശ്ചാത്തലത്തിൽ ഒരുങ്ങുന്ന ബിഗ് ബഡ്ജറ്റ് ചിത്രത്തിന്റെ 90 ശതമാനം ചിത്രീകരണം പൂർത്തി​യായി​. കൊവിഡ് പ്രതിസന്ധിയിൽ ഏറെനാൾ മുടങ്ങി​യ ചിത്രീകരണം അടുത്തി​ടെയാണ് പുനരാരംഭി​ച്ചത്. സംവിധായകന്റെ അറസ്റ്റോടെ ചിത്രീകരണം പ്രതിസന്ധിയിലായി.