കോലഞ്ചേരി: പാസ് ദുരുപയോഗം ചെയ്ത് മണ്ണ് കടത്തിയ രണ്ട് ലോറികൾ ലോഡുമായി കുന്നത്തുനാട് പൊലീസ് പിടികൂടി. വെസ്​റ്റ് മോറക്കാലയിൽ നിന്നാണ് മണ്ണ് കടത്തിയത്. വെമ്പിള്ളി സ്വദേശിയുടെ ഉടമസ്ഥതയിലുള്ളതാണ് വാഹനങ്ങൾ. പുത്തൻപള്ളിയിൽനിന്ന് ചെല്ലാനത്തേക്കും പാതാളത്തിലേക്കും മണ്ണ് കൊണ്ടുപോകുന്നതിനായിരുന്നു പാസ് ഉണ്ടായിരുന്നത്. ഇതിന്റെ മറവിലാണ് വെസ്​റ്റ് മോറക്കാലയിൽ മണ്ണടിച്ചത്. ഈ മേഖലയിൽ അനധികൃത മണ്ണെടുപ്പ് നടക്കുന്നുവെന്ന വിവരത്തെ തുടർന്ന് പ്രത്യേക ടീം രൂപീകരിച്ച് അന്വേഷണം നടക്കുന്നതിനിടയിലാണ് വാഹനം പിടികൂടുന്നത്. എ.എസ്.പി അനൂജ് പലിവാൽ, ഇൻസ്‌പെക്ടർ വി.ടി. ഷാജൻ, എസ്.സി.പി.ഒമാരായ പി.എ. അബ്ദുൽ മനാഫ്, പി.എം. നിഷാദ് തുടങ്ങിയവരാണ് അന്വേഷണ സംഘത്തിലുള്ളത്.