പറവൂർ: ലോകഭിന്നശേഷി സൗഹൃദദിനത്തിൽ മുസിരിസ് പൈതൃക പദ്ധതിയുടെ സ്റ്റുഡന്റ്‌സ് ഹെറിറ്റേജ് വാക്കിൽ പങ്കാളികളായി ഭിന്നശേഷി വിദ്യാർത്ഥികളും. ചേന്ദമംഗലം പാലിയം പാലസ്, പാലിയം നാലുകെട്ട്, കോട്ടപ്പുറം കോട്ട, പറവൂർ ജൂതപ്പള്ളി എന്നിവിടങ്ങളിൽ സംഘം സന്ദർശനം നടത്തി. ആലപ്പുഴ, വൈപ്പിൻ ബ്ലോക്ക് റിസോഴ്‌സ് സെന്ററുകളിൽ നിന്നായി അമ്പതോളം വിദ്യാർത്ഥികൾ പങ്കെടുത്തു. വൈപ്പിൻ ബ്ലോക്ക് പ്രൊജക്റ്റ്‌ കോഓർഡിനേറ്റർ ദിവ്യരാജ്, ആലപ്പുഴ ബ്ലോക്ക് ട്രെയിനർ കെ. നവാസ്, മുസിരിസ് പൈതൃക പദ്ധതി മ്യൂസിയം മാനേജർ കെ.ബി. നിമ്മി, സജ്ന വസന്തരാജ്, ജൂനിയർ എക്സിക്യുട്ടീവ് അഖിൽ എസ്. ഭദ്രൻ എന്നിവർ നേതൃത്വം നൽകി.