മൂവാറ്റുപുഴ: മൂവാറ്റുപുഴ ജനറൽ ആശുപത്രിയുടെ പ്രവർത്തനവും സേവനവും മെച്ചപ്പെടുത്തണമെന്ന് ഡി.വൈ.എഫ്.ഐ മൂവാറ്റുപുഴ ബ്ലോക്ക് സമ്മേളനം ആവശ്യപ്പെട്ടു. ആരോഗ്യവകുപ്പും സർക്കാരും ആശുപത്രിയിൽ വികസനപ്രവർത്തനങ്ങൾ നടത്തുന്നതിനൊപ്പം രോഗികൾക്ക് മികച്ച സേവനം ലഭ്യമാക്കാൻ അധികൃതർ തയ്യാറാകണം. മൂവാറ്റുപുഴയിലും പരിസര പ്രദേശങ്ങളിലുമുള്ള മയക്ക് മരുന്ന് മാഫിയാസംഘങ്ങളുടെ പ്രവർത്തനം തടയാൻ നടപടിയെടുക്കണമെന്നും സമ്മേളനം ആവശ്യപ്പെട്ടു. ജില്ലാ പ്രസിഡന്റ് പ്രിൻസി കുര്യാക്കോസ് സമ്മേളനം ഉദ്ഘാടനം ചെയ്തു. ബ്ലോക്ക് പ്രസിഡന്റ് ഫെബിൻ.പി മൂസ അദ്ധ്യക്ഷത വഹിച്ചു. ഭാരവാഹികളായി ഫെബിൻ.പി മൂസ (പ്രസിഡന്റ്), ജഗൻ ജോഷി, അൻസൽ മുഹമ്മദ് (വൈസ് പ്രസിഡന്റുമാർ), അനീഷ് എം. മാത്യു (സെക്രട്ടറി), എസ്. പ്രശാന്ത്, എൽദോസ് ജോയി (ജോയിന്റ് സെക്രട്ടറിമാർ), എം.എ.റിയാസ് ഖാൻ (ട്രഷറർ) എന്നിവരെ തിരഞ്ഞെടുത്തു.