കൊച്ചി: കൂടൽമാണിക്യ ക്ഷേത്രത്തിൽ നൃത്തത്തി​ന് വി​ലക്ക് നേരി​ടേണ്ടി​വന്ന മൻസിയ ശ്യാം കൃഷ്ണന് പിന്തുണ നൽകുമെന്ന് വിശ്വഹിന്ദു പരിഷത്ത് അറിയിച്ചു.

പരി​ഷത്ത് ആസ്ഥാനമായ കലൂർ പാവക്കുളം ശിവക്ഷേത്രത്തിൽ മൻസിയയ്ക്ക് സ്വീകരണം നൽകാനും നൃത്തം അവതരിപ്പിക്കാനും തീരുമാനിച്ചതായി​ സംസ്ഥാന പ്രസിഡന്റ് വിജി തമ്പിയും സെക്രട്ടറി വി.ആർ രാജശേഖരനും പ്രസ്താവനയി​ൽ പറഞ്ഞു. സർക്കാർ നിയന്ത്രണത്തിലുള്ള കൂടൽമാണിക്യം ദേവസ്വം ഏർപ്പെടുത്തിയ വിലക്ക് ഹിന്ദു മതത്തിനും സംസ്കാരത്തിനും വിരുദ്ധമാണ്. ഇക്കാര്യത്തിൽ സാംസ്കാരിക നായകർ മൗനം പാലി​ക്കുന്നത് ദുരൂഹമാണ്.