പെരുമ്പാവൂർ: കൂവപ്പടിയെ കേരസമൃദ്ധിയിലേക്ക് നയിക്കുകയെന്ന ലക്ഷ്യത്തോടെ ബ്ലോക്ക് പഞ്ചായത്ത് 'കേരം തിങ്ങും കൂവപ്പടി' പദ്ധതി നടപ്പാക്കുന്നു. ബ്ലോക്കിലെ വീടുകളിൽ ഒരോ തെങ്ങിൻതൈ വീതം എത്തിച്ച് ദേശീയ ഗ്രാമീണ തൊഴിലുറപ്പ് തൊഴിലാളികളുടെ സഹായത്തോടെ നട്ടുകൊടുക്കുന്നതാണ് പദ്ധതി.

തൈ മാത്രം വിതരണം ചെയ്താൽ ഉദ്ദേശിച്ച ഫലം ലഭിക്കില്ല എന്ന വിലയിരുത്തലിൽ നിന്നാണ് തെങ്ങിൻ തൈ വീട്ടിലെത്തിച്ച് നട്ടുകൊടുക്കുക എന്ന ആശയം ഉദിച്ചത്. തെങ്ങിൻ തൈ സ്വന്തമായി ഉത്പാദിപ്പിക്കുകയാണ് ചെയ്യുന്നത്. തൊഴിലുറപ്പ് പദ്ധതിയുമായി സഹകരിച്ച് സ്വന്തമായി ഒരു തെങ്ങിൻ തൈ നഴ്‌സറി കൂവപ്പടി ബ്ലോക്ക് പഞ്ചായത്ത് വളപ്പിൽ ആരംഭിച്ചു. ഗുണമേന്മയുറപ്പാക്കി ശാസ്ത്രീയമായ രീതിയിലാണ് തെങ്ങിൻ തൈകൾ ഒരുക്കുന്നത്. ബ്ലോക്ക് പഞ്ചായത്തിന്റെ മേൽനോട്ടത്തിൽ കൃത്യമായ പരിചരണവുമുണ്ട്.

പദ്ധതിയുടെ ആദ്യഘട്ടത്തിൽ 5,000 തെങ്ങിൻതൈകൾ നട്ടുകൊടുക്കും. ഘട്ടംഘട്ടമായി 50,000 തൈകൾ ഉത്പാദിപ്പിച്ച് വീടുകളിലെത്തി നട്ടുകൊടുക്കുകയാണ് ലക്ഷ്യം. തൈ നടാൻ ഉത്തമമായ സമയമായി കണക്കാക്കപ്പെടുന്ന മേടപ്പത്തിന് പദ്ധതിക്ക് തുടക്കമാകും. തൈ നട്ടുകൊടുക്കുന്നതിന് പുറമേ തുടർപ്രവർത്തനങ്ങളും ആലോചിക്കുന്നുണ്ടെന്ന് ബ്ലോക്ക് പഞ്ചായത്ത് പ്രസിഡന്റ് ബേസിൽ പോൾ പറയുന്നു.

പദ്ധതിയുടെ ഭാഗമായി തൊഴിലുറപ്പ് തൊഴിലാളികൾക്ക് നിരവധി തൊഴിൽ ദിനങ്ങളും ലഭിക്കും. പദ്ധതിക്കായി ആദ്യഘട്ടത്തിൽ പത്ത് ലക്ഷം രൂപയാണ് ബ്ലോക്ക് പഞ്ചായത്ത് നീക്കിവച്ചിരിക്കുന്നത്.